27/05/2026
Vushtrria vazhdon të mbetet pa ujë, shtohen thirrjet për ndarje nga Ujësjellësi Rajonal
VUSHTRRI, 27 MAJ 2026 (Vushtrria Press) - Problemet me furnizimin me ujë të pijshëm në Komunën e Vushtrrisë po vazhdojnë tash e shumë vite, duke shkaktuar pakënaqësi të vazhdueshme tek qytetarët.
Kompania Rajonale e Ujësjellësit “Mitrovica” po kritikohet se nuk po arrin të sigurojë furnizim stabil dhe të rregullt me ujë për banorët e Vushtrrisë, ndërsa mungesat e shpeshta të ujit po bëhen gjithnjë e më shqetësuese.
Gjatë pasdites së djeshme, po ashtu edhe sot, një pjesë e madhe e territorit të Komunës së Vushtrrisë ka mbetur pa ujë të pijshëm, duke vështirësuar jetën e qytetarëve dhe funksionimin normal të amvisërive.
Në këto rrethana, po shtohen zërat që Vushtrria të ndahet nga Ujësjellësi Rajonal dhe të krijojë një sistem të pavarur të menaxhimit të ujit.
Vushtrria tashmë posedon Impiantin e Përpunimit të Ujit në fshatin Balincë, që konsiderohet një aset i rëndësishëm për funksionimin e një ujësjellësi të pavarur vushtrrias.
Si shembull i një menaxhimi të suksesshëm lokal po përmendet edhe pavarësimi i shërbimit të mbeturinave. Kompania NPL “Përparimi” Sh.A në Vushtrri vazhdon të vlerësohet pozitivisht nga qytetarët për shërbimet që ofron.
Mbetet të shihet nëse në të ardhmen institucionet komunale do të ndërmarrin hapa konkretë për pavarësimin edhe të sektorit të furnizimit me ujë në Vushtrri.
———
📸: Vushtrria vazhdon të mbetet pa ujë, shtohen thirrjet për ndarje nga Ujësjellësi Rajonal
———
➡️Videot, fotot, shkrimet, opinionet, komentet e lexuesve, sondazhet online, reagimet apo intervistat nga politika dhe shkrimet nga fushata zgjedhore nuk paraqesin qëndrimin e redaksisë së Vushtrria Press
