05/09/2026
လူပေါင်းထောင်ချီကို အလုပ်အကိုင်ပေးထားတဲ့ Teng Hui Myanmar အထည်ချုပ်စက်ရုံ လကုန်မှာ အပြီးပိတ်သိမ်းမည်
ရန်ကုန်၊ စက်တင်ဘာ ၃
မြန်မာနိုင်ငံမှာ ၁၃ နှစ်ကျော် လည်ပတ်လာပြီး လူပေါင်းထောင်ချီကို အလုပ်အကိုင်ပေးထားတဲ့ Teng Hui Myanmar အထည်ချုပ်စက်ရုံကြီး လကုန်မှာ အပြီးပိတ်သိမ်းတော့မယ် လို့ ဝန်ထမ်းတွေကို အသိပေးထားပါတယ်။
စက်ရုံဘက်က စက်တင်ဘာ ၂ ရက်မှာ ဝန်ထမ်းတွေကို ပိတ်သိမ်းမယ့်အကြောင်း အသိပေးခဲ့တာဖြစ်ပြီး လက်ရှိမှာ လုပ်သား ၃,၀၀၀ ကျော်ရှိကာ အများစုက အမျိုးသမီးဝန်ထမ်းတွေ ဖြစ်တယ်လို့ သိရပါတယ်။
ရန်ကုန်တိုင်း၊ ထန်းတပင်မြို့နယ် ရိုးကြီးဘက်မှာရှိတဲ့ Teng Hui Myanmar ဟာ အထည်ချုပ်စက်ရုံ ၅ ရုံနဲ့ လည်ပတ်ခဲ့တာဖြစ်ပြီး အရင်က လူပေါင်း ၆,၀၀၀ ကျော်အထိ အလုပ်အကိုင်ပေးနိုင်ခဲ့တဲ့ စက်ရုံကြီးတစ်ခုလည်း ဖြစ်ပါတယ်။
စက်ရုံပိတ်ရတဲ့အကြောင်းရင်းနဲ့ ပတ်သက်ပြီးတော့ အဓိကဝယ်ယူသူဖြစ်တဲ့ H&M ဘက်က အော်ဒါတွေ မမှာတော့တာကြောင့် လုပ်ငန်းဆက်လက်လည်ပတ်ဖို့ အခက်အခဲဖြစ်လာတာလို့ စက်ရုံမန်နေဂျာတစ်ဦးရဲ့ ပြောဆိုချက်မှာ ပါရှိပါတယ်။
ဝန်ထမ်းတွေအတွက်တော့ သတ်မှတ်ထားတဲ့ စာချုပ်တွေအတိုင်း နစ်နာကြေးတွေ ပေးအပ်သွားမယ်လို့ သိရပြီး စက်တင်ဘာ ၁ ရက်ကနေ ၃၀ ရက်အတွင်း အလုပ်သစ်တွေ ရှာထားဖို့လည်း အသိပေးထားပါတယ်။
Teng Hui Myanmar လို စက်ရုံကြီးတစ်ခု ပိတ်သွားတာက စက်ရုံတစ်ခု ပိတ်သွားတာထက် ပိုပါတယ်။
အလုပ်သမား ထောင်ချီရဲ့ နေ့စဉ်ဝင်ငွေ ပျောက်သွားတာဖြစ်သလို သူတို့နောက်မှာ မှီခိုနေရတဲ့ မိသားစုတွေအတွက်လည်း ထိခိုက်မှုတွေ ရှိလာနိုင်ပါတယ်။
အထူးသဖြင့် အထည်ချုပ်လုပ်ငန်းမှာ အမျိုးသမီးငယ်တွေ အများအပြား အလုပ်လုပ်ကိုင်နေကြတာဆိုတော့ စက်ရုံတွေ ဆက်တိုက်ရပ်နားလာရင် အလုပ်အကိုင်အခွင့်အလမ်း ရှားပါးလာနိုင်တဲ့အခြေအနေပါ။
ဈေးကွက်မှာလည်း အော်ဒါတွေကို သတ်မှတ်ချိန်အတွင်း မပေးနိုင်တာ၊ ကုန်ကျစရိတ်နဲ့ လုပ်ငန်းလည်ပတ်မှုအခက်အခဲတွေ များလာတာတွေရှိရင် လုပ်ငန်းရှင်တွေအနေနဲ့ အခြားနိုင်ငံတွေကို ပြောင်းရွှေ့ဖို့ ဆုံးဖြတ်လာနိုင်ပါတယ်။
အခု Teng Hui Myanmar ပိတ်သိမ်းတော့မယ့်အတွက် စက်ရုံထဲက အလုပ်သမားတွေ ဝမ်းနည်းနေကြတဲ့ မြင်ကွင်းတွေကလည်း စိတ်မကောင်းစရာပါ။
နေ့တိုင်းသွားလာပြီး အသက်မွေးဝမ်းကျောင်းပြုခဲ့တဲ့ အလုပ်နေရာတစ်ခု ရုတ်တရက်ပျောက်သွားတော့ သူတို့အတွက် ဘယ်လောက်ထိ ခက်ခဲမလဲဆိုတာ တွေးကြည့်လို့ရပါတယ်။
လကုန်ရင်တော့ Teng Hui Myanmar ရဲ့ တံခါးတွေ ပိတ်သွားတော့မှာဖြစ်ပြီး အလုပ်သမားထောင်ချီအနေနဲ့ အလုပ်သစ်တွေ ပြန်ရှာကြရတော့မှာ ဖြစ်ပါတယ်။
