22/08/2025
22/8/2025
港鐵尖東站Chiikawa展覽廣告 「東鐵椏杈」惹回憶熱議
近來風靡世界各地嘅日本卡通角色 ちいかわ／Chiikawa／吉伊卡哇，今期落腳香港尖沙嘴舉行《Chiikawa Days》主題展覽；港鐵更喺毗鄰展場嘅尖東站為該展覽粉飾一番，包括喺尖東站大堂近K出口嘅一組閘機同附近牆壁，貼上《Chiikawa Days》主題展覽卡通角色圖樣；而港鐵甚至喺閘機設置Chiikawa卡通角色配音嘅過閘鈴聲，喺香港鐵路史上可謂破天荒措施。
然後，有眼利網民發表評論，表示發現《Chiikawa Days》主題展覽喺尖東站所設置廣告當中，其一藍尾藍耳賓士貓角色 ハチワレ／Hachiware／小八貓 手持藍色椏杈【※見圖1至圖6】，當堂諗起尖東站仍然係 九廣東鐵／港鐵東鐵綫 車站、一車直達羅湖站同落馬洲站嘅景況，腦海浮現起當其時尖東站出現嘅 九廣東鐵／港鐵東鐵綫 椏杈形路綫圖。
以下講下尖東站椏杈形路綫以及途經路線演變嘅歷史：──
●2004年10月24號：九廣東鐵尖東站通車：
○九廣東鐵南行終點站由紅磡站延伸去尖東站，係1975年11月30號九廣鐵路九龍總站由尖沙嘴搬往紅磡（今紅磡站）後事隔39年再有列車直達尖沙嘴核心；
●2007年8月15號：九廣東鐵落馬洲支綫通車【※見圖1之左】：
○北上全程列車到達上水站後，由以往全部駛往羅湖站，改為有個別班次分流駛入落馬洲站；
○此安排令九廣東鐵由「有耳直條形路綫」變成「有耳椏杈形路綫」；
●2007年12月1號半夜至2007年12月2號清晨：兩鐵合併【※見圖7】：
○九廣鐵路服務移交予地鐵經營；
○同時「地鐵」品牌中文改名「港鐵」，而品牌英文維持使用「MTR」；
○九廣東鐵亦改稱港鐵東鐵綫，原有九廣鐵路風格嘅指示牌同路綫圖均改用港鐵風格，而路綫顏色亦由海藍色改為天藍色，以避免同港島綫顏色寶藍色混淆【※見圖1之右】；
●2009年8月15號：尖東站移至西鐵綫前最後一日歸屬東鐵綫，亦係最後一日有列車以椏杈形路綫方式往羅湖站或落馬洲站；
●2009年8月16號：尖東站移交西鐵綫使用：
○尖東站由東鐵綫終點站成為西鐵綫中途車站；
○東鐵綫南行終點站由尖東站縮返去紅磡站；
○由尖東站乘搭西鐵綫列車可直達屯門站至紅磡站，如果要去往羅湖站或落馬洲站則要搭西鐵綫到紅磡站再轉搭東鐵綫繼續行程；
●2021年6月27號：西鐵綫、馬鞍山綫同「沙中線工程項目嘅大圍─鑽石山─紅磡段」正式合併為完整嘅屯馬綫，由尖東站乘搭屯馬綫列車可直達屯門站至烏溪沙站，成為全香港最長（56.4公里）、最多車站（27個車站）以及最多屬線車廠同停車場（八鄉車廠、大圍車廠、紅磡停車場）嘅通勤鐵路綫，形成今日途徑尖東站列車嘅行車格局【※見圖3】。
時移世易，市民同乘客有幾多重有印象，尖東站喺運作頭5年左右曾經屬於九廣東鐵／港鐵東鐵綫，並有椏杈形路綫往羅湖站或落馬洲站？該網民「睹物思綫」實在勾起不少有返呾上下年紀市民乘客對尖東站嘅回憶【※見圖1】。
#謎謎
#熱議
#椏杈
#ちいかわ
#吉伊卡哇
#ハチワレ
#小八貓
#賭物思綫
#如有雷同
#實屬巧合
#港鐵
#港鐵東鐵綫
#東鐵綫
#九廣東鐵
#東鐵
#尖東站
#尖東
#尖沙嘴
#尖沙咀
