11/05/2026
Pa nisur sezoni, nis kaosi! Java nis me trafik kilometrik në aksin Milot–Lezhë–Balldren.
Prej vitesh, banorët e veriut të Shqipërisë dëgjojnë të njëjtën histori për aksin Milot–Balldren: “projekti është gati”, “hapet gara”, “nis tenderimi”, “punimet fillojnë së shpejti”. Por ndërsa deklaratat riciklohen çdo sezon, realiteti në terren mbetet po ai trafik kilometrik, kaos, radhë pafund automjetesh dhe mijëra qytetarë të bllokuar në një nga akset më problematike të vendit.
Edhe këtë vit, pa nisur ende fluksi i plotë i sezonit veror, rruga Milot–Lezhë–Balldren po kthehet në makthin e përditshëm të drejtuesve të mjeteve, turistëve dhe emigrantëve që zgjedhin veriun dhe bregdetin shqiptar. Pamjet e radhëve të gjata dhe pritjeve për orë të tëra janë bërë tashmë normale, ndërsa institucionet vazhdojnë të japin premtime pa fund për një projekt që duket se ekziston vetëm në letra dhe konferenca shtypi.
Ironia më e madhe është se kjo rrugë është ndoshta aksi më i inauguruar pa u ndërtuar asnjëherë. Çdo vit ka një lajm të ri, një premtim të ri dhe një afat të ri, por asnjë metër asfalt që t’u japë zgjidhje qytetarëve. Ndërkohë, veriu vazhdon të trajtohet si një zonë që mbahet gjallë me propagandë dhe jo me investime reale.
Pavarësisht përpjekjeve të Policisë Rrugore për të menaxhuar situatën, fluksi i madh i automjeteve e bën pothuajse të pamundur shmangien e kaosit. Qytetarët shprehen të revoltuar, pasi sipas tyre, prej vitesh po mashtrohen me të njëjtin projekt, ndërsa përballen çdo verë me të njëjtën vuajtje në rrugë.
Në fund, Milot–Balldren mbetet simboli më i qartë i premtimeve të pafundme dhe punëve që nuk nisin kurrë. Sepse në Shqipëri, ndonjëherë duket se rrugët ndërtohen më shpejt në fjalime sesa në realitet.
