19/08/2026
TAN-AWAI CPT MAGON SA 97TH IB, MIPATIN-AW SA GILUSAD NGA NON-COMBATANT EVACUATION OPERATION SA BRGY GULAYON, EVACUATION CENTER
Mipatin-aw si CPT Manuel Magon, kinsa Civil-Military Operations (CMO) Officer sa 97th IB, Philippine Army nga gilusad ang non-combatant evacuation operation isip parte sa KALASAG-Zamboanga del Norte Inter-Agency Territorial Defense Operations Exercise nga gipahigayon sa Evacuation Center, Barangay Gulayon ning dakbayan, karong adlawa, Agosto 18, ning tuiga.
Saysay pa ni CPT Magon nga gimugna ang kalihokan aron masayran sa katawhan kung asa mubakwit panahon kung ugaling adunay emerhensiya. Nasayran nga unang gipangbakwit mao ang mga senior citizen, mga bata, Persons with Disabilities(PWD) ug uban pang mga residente nga gikan sa barangay sa Miputak, Galas ug Olingan ning dakbayan.
Atol sa kalihokan gipahigayon ang medical outreach program sa kagamhanang lokal ning dakbayan pinaagi sa City Health Office, kung asa napahimuslan sa mga evacuees ang libreng konsulta ug tambal gikan sa mga ahensya ug organisasyon nga miduyog ug misuporta sa kalihokan.
Tumong sa maong simulation exercise mao ang pagpatuman sa hapsay nga pagpabakwit sa mga sibilyan sa panahon nga adunay emerhensiya ngadto sa luwas nga lugar sa naasoy'ng tulo ka coastal barangay, kung asa anaa sa 150 ka sibilyan ang gipangbakwit aron sa ingon niana aduna na silay kaalam panahon sa emerhensiya.
