06/08/2025
KO'OS GAAN HUIS TOE | Kerriehoendervulsel vir pannekoek
Met die dat ons onlangs ‘n paar sonskyndae gehad het, begin mens al uitsien na die Lente.
Dalk is jou lus vir pannekoek wel nog nie geblus nie en eintlik kan mens mos ook nie verkeerd gaan met kerrie nie. Hierdie kerriehoenderpannekoeke is lig en geurig en nie so swaar soos ‘n tradisionele wintergereg nie.
Probeer gerus Ko’os gaan huis toe se smullekker kerriehoendervulsel wanneer jy weer pannekoek bak. Die resep is genoeg vir 4 – 6 mense.
JY BENODIG:
VULSEL:
3 eetlepels olie
1 middelslag-ui, gekap
1 knoffelhuisie, gekneus
1 eetlepel kerriepoeier
1 eetlepel masala
4 hoenderborsies, in repies gesny
1 blik (400 g) tamaties (ons het Indiese tamaties gebruik)
1 blik (400 g) kekerertjies, gedreineer
SOUSIE (‘n Indiese raïta)
4 eetlepels ongegeurde jogurt
1 komkommer, gerasper
1 knoffelhuisie, gekneus
’n handvol vars pietersielie, gekap
sout en peper na smaak
’n handvol vars koljanderblare, gekap
METODE:
Verhit 2 eetlepels olie in ’n pan en braai die ui en knoffel oor lae hitte tot sag.
Sprinkel die kerrie en masalapoeier oor, roer alles deur en braai dit vir ongeveer 5 minute.
Voeg die res van die olie by en verhit. Voeg dan die hoenderrepies by en braai vinnig tot goudbruin.
Voeg die tamaties en kekerertjies by en laat dit vir 5 minute saam kook.
Draai die hitte laer en laat dit vir nog 15 - 20 minute prut.
Hou die vulsel nou eenkant.
MAAK DIE SOUS:
Meng die jogurt, komkommer, knoffel en pietersielie goed saam. Geur dit met sout en peper.
Skep van die hoenderkerrie in die middel van elke pannekoek en rol dit op.
Sprinkel vars koljanderblare oor en sit dit voor saam met ’n skeppie van die jogurtsous.
WENK: Die sousie is dalk ‘n bietjie ekstra moeite, maar dit balanseer die hitte van die kerrie.
