Iphepha Lam

Iphepha Lam We are a Matatiele-based national news publisher. We print a weekly newspaper every Friday

GQABA: "Ulutsha maluyeke utywala!" - kutsho uMalema. "UKaffir sakumbeka endaweni yakhe!" - kutsho uZuma. "Sityala iR1-Tr...
16/06/2026

GQABA: "Ulutsha maluyeke utywala!" - kutsho uMalema. "UKaffir sakumbeka endaweni yakhe!" - kutsho uZuma. "Sityala iR1-Trillion kwiziseko zophuhliso!" - kutsho uRamaphosa... Konke oku ngalo mhla wolutsha / . Iinkcukacha ngezantsi.

"Ukuba xa usele uye uzibhaqe sele usilwa nabantu, buyeke! Ukuba xa sele utywala uye uzibone unkula abafazi, buyeke! Ukuba xa usele utywala uye uphoswe ngamathuba okanye awukwazi ukusebenza, buyeke utywala! Andithi mabuyekwe mpela utywala, kodwa ukuba abukusebenzeli utywala ndicebisa elokuba umntu ohlukane nabo!" kutsho umongameli we-EFF, uJulius Malema weEFF, ePitoli namhlanje. Uye waqhuba wathi umbutho weANC wohlulakele kulawulo loMzantsi Afrika.

Ngalo mhla wokuqaphela iminyaka engama-50 yesiganeko sokubulawa kolutsha oluntsundu ngurhulumente wamabhulu pha koka-1976 ngalo mhla we-16 kweyeSilimela, oosopolitiki bakhwele besehla kumaqonga ngamaqonga beshumayela izwi elinye elithi kufuneka ulutsha luncedqw kwaye luvulelwe amathuba kweli.

"Ingaba uMzantsi Afrika wenza okwaneleyo kwicala lokudala amathuba engqesho nokuzisebenzela kweli? Mandulo urhulumente wocalucalulo wayesithi umntwana omnyama kufuneka angafundiswa kakhulu; afundiselwe nje ukuba akwazi ukuthwala iinkuni nokuthunywa, hayi ukucinga. Namhlanje kufuneka siyitshintshe lo nto! Yinto engange-4.7 yezigidi zolutsha lwaseMzantsi Afrika lubhuqwa yintswela nqqesho. Eli nani alamkelekanga konke konke kwaye singurhulumente kweli sizakutyala imali enganeR1-Trillion kwiziseko zophuhliso ezakuthi ziqeshe ulutshwa kwaye nolutsha luzivulela amashishini," kutsho Mongameli Cyril Ramaphosa ethetha eSoweto namhlanje nalapho acenge abaqeshi ukuba bayeke le nto yokufuna amava okusebenza xa eqesha abantu abatsha. "Baqesheni kuqala, nibaqeqeshe bengaphakathi!"

Ukanti pha eErmelo, eMpumalanga, naye owayesakuba ngumongameli weli uJacob Gedleyihlekisa Zuma (weMkhonto weSizwe ngoku) uye wabalula imbali yokuphucwa kwamaNgesi ngamaBhulu mandulo phamb' kokuba athi "yimi phez' koKaffir manje! Umntu omnyama ngeke abuse la, sakumbeka endaweni yakhe! Ngelo sikhathi ulutsha lwabantsundu kwanyanzeleka ukuba ludale imanyano zolutsha. Kwakhiwa nentsha yeANC, kuphikiswana nabacinezeli! Balwa ingcinezelo... Isikathi kwakhona sesifikile ukuthi sithathe izwe loobabamkhulu bethu! Abantu ababaningi ngenani ngabo abazakuphatha izwe!"

UZuma uye wayilanda imbali yalo mhla ka ngesiZulu ekwacacisa nendlela ulutsha olwalwa ngayo ukufundiswa ngesiBhulu ezikolweni.

Kudutyulwe amaqabane kaKhongolose kuQumbu!Ngentsasa yayizolo owayefudula engusihlalo wesebe leANC Youth League eMpuma Ko...
14/06/2026

Kudutyulwe amaqabane kaKhongolose kuQumbu!

Ngentsasa yayizolo owayefudula engusihlalo wesebe leANC Youth League eMpuma Koloni, uWonele Gontshi, ekhatshwa ngumphathi wezolonyulo laseMhlontlo, uNgawonke Bulala, baye bangena kwikhemesti esekuqaleni kwidolophana yakuQumbu ngelithi bayokuthenga izifonyo.

Mzuzwana-mzuwana bengenile kule khemesti kuye kwambonzelela isijamankungwini, ekurhanelwa ukuba besingahambi sodwa, emnyango, saze sathulula iimbumbulu ngakuGontshi noBulala nomnye ebebehamba naye.

Emva kwesithukuthezi sento engapheliyo sezithonga zompu kuye kwathi cwaka. Kwaqhuma irhuluwa, kwathi saa amaqokobhe weembumbulu neembumbulu ezingasetyenziswanga.

Amapolisa afike pha emva kwentsimbi yeshumi elinanye kusasa kule khemesti. Afike uGontshi sele enabele uqaqaqa, wabe ugxa wakhe wakwaBulala, oye wabalekiselwa esibhedlele, ekwimeko emaxongo.

"Ukudutyulwa kukaComrade Gontshi kusikhuthuze itshantliziyo elingayiwayo nebelinegalelo elikhulu kumsebenzi weANC kule ngingqi yaseMhlontlo. Ebesele elilungu leBranch Executive Committee yeGeneral Maqutyana Branch kuWard 14. Sithi makuthunyelwe ooKhetshe [Hawks] nabacuphi abakuthi bazikhangele zingekapheli iiyure ezingama-72 ezi zikrelemnqa zenze obu bubi! Sithi ngxe kusapho kwaye sikwanqwenela ukuba uComrade Ngawonke Bulala aphile ngoko nangoko!" kutsho uYanga Zicina osisithethi kwiANC.

"Singamapolisa akuQumbu simanxadanxada siqhuba uphando kulo mba wokubulala kwanokuzama ukubulala pha kwikhemesti eseSejoseng Business Centre, kuQumbu, ngoMgqibelo umhla we-13 kule yeSilimela 2026. Unobangela wesi siganeko awukaziwa. Akukabanjwa mntu kwaye nabarhanelwa abakaziwa ukuba ngoobani," kutsho upoposho olusuka emapoliseni.

Oonozithuthuthu bathuthuzela usapho lukaMzoli!Namhlanje oonozithuthuthu bombutho iBraveheartz neWestern Cape Biking Comm...
13/06/2026

Oonozithuthuthu bathuthuzela usapho lukaMzoli!

Namhlanje oonozithuthuthu bombutho iBraveheartz neWestern Cape Biking Community baye batyelela usapho lakwaNgcawuzele eNY 111, nalapho baye ngeliyokuthi tutwini kusapho bekwavakalisa nentlungu yabo yokulahlekelwa lilungu labo elinguMzoli Ngcawuzele obekwanguye nosomashishini ophume izandla nobedume ngendawo yakhe yenyama ekwakusithiwa kuse-Mzoli's Meat eGugulethu kwakunye nokubayinxalenye yolwakhiwo lweevenkile ezininzi eKapa, Qonce naseMdantsane.

Emva kokubona usapho nemihandazo, aba nozithuthuthu baye bajikeleza izitalato zaseGugulethu ngezithuthuthukazi kwanemicagogo yeminyobo yemigrugra yeemoto zikanokutsho ebezikhokela zikhwelise amalungu wosapho.

Inkonzo yesikhumbuzo: Izakubanjwa ngoLwesithathu umhla we-17 kule veki izayo kwiholo loluntu laseMontana eKapa.

Isifihlo: UMzoli uzakubekwa kwikhaya lakhe lokugqibela ngoLwesihlanu umhla we-19 kule yeSilimela (Juni) 2026, kwaye izakuba ngumngcwabo ozakuqhutywa ngurhulumente.

UMzoli ulishiye eli kule mpelaveki igqithileyo, eneminyaka engama-71 esidla amazimba. Impilo ibingamphethanga kakuhle oko wahlaselwa siStroke pha koka-2013. Ingxelo epheleleyo ngayo besiyibhale kweli khonkco lomnatha: https://www.facebook.com/share/p/1CjggEb4hh/

Nantsi imifanekiso yanamhlanje, eGugulethu:

UMasipala owayekade elihlazo unesakhiwo esitsha kraca seR257-Million eGcuwa!"Kwiminyakana nje embalwa edlulileyo umasipa...
09/06/2026

UMasipala owayekade elihlazo unesakhiwo esitsha kraca seR257-Million eGcuwa!

"Kwiminyakana nje embalwa edlulileyo umasipala waseMnquma wayesisihogo sikaSathana; ihlazo nje likamasipala kodwa kule mihla sithetha enye into!" kutsho owayekade exelenga kwezonxibelelwano kwi-Ofisi yeNkulumbuso eMpuma Koloni, uNomfanelo Kota.

"Ndiqale ukulandela iinkqubo zalo masipala waseMnquma kule nyanga iphelileyo ngethuba ndigqitha pha ndisingise eNtshatshongo (eFort Malan). Bayaqhuba! Inkqubela-phambili abayenzayo ingangumzekelo omhle kakhulu koomasipala bethu abangama-257 kweli. Andinothi hayi ukuba kungathiwa ndidityaniswa nomye woomanejala kwakunye nosodolophu uTunyiswa Manxila-Nkamisa ubuqu ukuze nje bandithele thsuphe ngalo mlingo bawenzayo ngethuba belungisa lo masipala!"

La mazwi kaKota siwakhunjuzwe ngumsitho wokuvulwa, ngokusesikweni kwesakhiwo sikanokutsho esitsha sikamasipala waseMnquma pha edolophini yaseGcuwa kumntla weBlythe Street xa usiya ngaseExtension 6 pha.

"Today is a proud day for the people of Mnquma, Iphondo lonke ne-ANC ngokukodwa. We are gathered here today to officially open this
impressive municipal office precinct, a facility that represents not only an investment in infrastructure, but an investment in good governance, accountability and service delivery," kukhumshe kwatsho inkulumbuso uLubabalo Mabuyane ngale ntsasa exhagwe ngusodolophu uManxila-Nkamisa neKumkani yamaXhosa uAhlangene Sigcawu (Aa! Vulikhaya!) kwakunye nooceba namagosa karhulumente.

"Bekufanelekile ukuba esi sakhiwo sithiywe ngegama likaMfundisi uTiyo Soga; unyana weli phondo esakuhlala sizingomba izifuba ngaye."

*Imifanekiso yesakhiwo esitsha salo masipala:

Umongameli uvuma ubutyhifilili nobu-ethe-ethe bukarhulumente kumba wabafiki abangekho semthethweni!Abantu abaqesha abafi...
07/06/2026

Umongameli uvuma ubutyhifilili nobu-ethe-ethe bukarhulumente kumba wabafiki abangekho semthethweni!

Abantu abaqesha abafiki abangenamaphepha, bazakubanjwa. Amagosa anobuqhophololo, azakubanjwa. Zizakuphela nya ii-ID eziluhlaza! Urhulumente uyazazi ukuba akenzi msebenzi waneleyo ekulweni umba wabafiki abangenamaphepha kweli. Konke oku kutshiwo nguMongameli Cyril Ramaphosa ngokuhlwa ngethuba ethetha nesizwe ngamanyathelo abaceba ukungenelela ngawo kumba wabafiki kweli laseMzantsi Afrika.

UMongameli ukwakhalimele imibutho emitsha kwanabemmi baseMzantsi Afrika abazama ukuthathela umthetho ezandleni zabo nabaqweqwedisa abantu befuna ukuzibonela amaphepha wabo wokuba seMzantsi.

"Abantu mabahloniphe umthetho. Sonke siyazi ukuba sinengxaki yabantu bamanye amazwe abalapha ngokungekho semthethweni. Oku kubangela uxinizelelo kwezempilo, ekuhlaleni, kwimisebenzi nasekufikeleleni kwiinkonzo zikaRhulumente.

"Sikwanayo nengxaki yabaqeshi abaqesha abantu abangenawo amaphepha kuba befuna ukubabhatala kancinci, babasebenzise neeyure ezinde. Kubalulekile ukuba abaqeshi bohlukane nalo mkhuba! Bazakubanjwa abenza oku.

UMongameli ukwathe bengurhulumente bayaziva izikhalo zabahlali ngobunini beevenkile zasekuhlaleni zohlobo lweeSpaza Shop. Urhulumente uzakuza neenkqubo zenkxaso-mali zabemmi beli ukuba bakwazi ukuzenzela ezi Spaza Shop.

Gqaba-gqaba ngamanyathelo awathembise ngokuhlwa umongameli:

1. Sizakuqala ukulandelela imithetho yokushishina nokuqeshwa kwabantu ngokungekho semthethweni. Sakuba neenkundla ezibekekileyo zokujongana nalo mba kwanomba wabaqeshi abaqesha abafiki abangenamaphepha. Le nto yesohlwayo sodwa ayonelanga, kufuneka babanjwe nokubanjwa ngoku.

2. Sakuqinisa imithetho yokungena kweli laseMzantsi Afrika. Amapolisa kwakunye nesebe lezekhaya lizakuqinisa ugqogqo kwanokomelezwa kwemida yeli. Sizakutyala imali kubuxhakaxhaka bale mihla bokuqinisa imiqathango yokungena kweli.

3. Sizakulwa ubuqhophololo pha kwisebe lezekhaya. Amagosa athengisa amaphepha ayingxaki. Azakugxothwa kwaye abanjwe amagosa enza ubuqhophololo obunje. Siyaziphelisa izazisi (ID) eziluhlaza ngoba zizo ezi ezenza kube lula ukwenza ii-ID zomgunyathi. Zizakuphela kungekudala ii-ID eziluhlaza.

4. Imithetho yokungena eMzantsi Afrika iyozoyozo kwaye iyakwazi ukutsibeka lula. Sizakuqinisa nalapha. Sizakuba nenani elithile esithi amashishini mawangaligqithi xa eqesha abemmi bangaphandle.

5. Sakuthetha namanye amazwe ngale ngxaki yabemmi babo abalahlekela eMzantsi Afrika ngokungekho semthethweni. Kufuneka sithethe ngezizathu zokuba abantu babalekele apha. Ayizokuba yimithetho yodwa esincedayo, kufuneka silwele uzinzo kwamanye amazwe aseAfrika. Kufuneka sifikele kwisigaba sokuba abantu bangahambi kumazwe wabo ngenxa yobunzima kuphela.

Ulishiyile eli uMzoli!Emva kweminyaka yamarhe athi ubhubhile ude wabe uyanikezela umakhwekhwetha wezoshishino kwiilokish...
07/06/2026

Ulishiyile eli uMzoli!

Emva kweminyaka yamarhe athi ubhubhile ude wabe uyanikezela umakhwekhwetha wezoshishino kwiilokishi onguMzoli Ngcawuzele. Ebezakugqiba iminyaka engama-72 kweyeDwarha kulo nyaka kodwa impilo ibingekho ntle oko wabethwa siStroke pha koka-2013 waze pha koka-2021 wavala netshisanyama yakhe yodumo ekwakusithiwa kukwaMzoli okanye Mzoli's Meat, eNY115 eGugulethu.

Yayiyitshisanyama kanokutsho eyayisoloko igcwele oosaziwayo kwaye yena umnikazi edume ngokuba nempatho entle.

Ebengaphelelanga kweli shishini uNgcawuzele; kwangoo-1990 wavula isilarha neevenkilana eGugulethu, ibikwanguye owaqinisekisa ukwakhiwa kodederhu lweevenkile leR350-million elaziwa njengeGugulethu Square. NaseQonce, ngenkampani yakhe iMzoli Properties, wakha udederhu lweevenkile olwaziwa njengeMetlife Mall esele kusithiwa yiThe Mall kule mihla. EMdantsane eMonti wayenefuthe ekwakhiweni kweKuyasa Shopping Centre.

UNgcawuzele wayezimisele ngophuhliso lwezoshishino kwiindawo zabantsundu. Ukugqibela kwethu ukuthetha naye kudala wayenomnqweno wokuvula uPick n Pay eGugulethu ekwafuna nokulungisa iindawo zokudlala zabantwana. Ebekwaxhasa nekhaya labadala (Ekuphumleni old age home) eliseGugulethu.

Ushiya ngasemva unkosikazi wakhe nentombi enye. Oonyana bakhe, uUnathi noMandisi babhubha koka-2007 nakoka-2009. Owokuqala warhaxwa kulwandle iStrandfontein waze owokugqibela, uMandisi, wagaxeleka kwingozi yemoto eKapa.

"Ebengunyana wam wokugqibela. Ithemba lam lokugqibela. Ikamva losapho. Ebeyinto yonke yethu," kwatsho uNgcawuzele emva kokubhubha kukaMandisi awayesele emenze umnikazi weMzoli's Meat ngoko.

Abafundi ababini babhubhe ngeendlela ezikrokrisayo kule mpela veki!Pha ngentsimbi yokuqala emini ngeCawe (izolo) umfundi...
02/06/2026

Abafundi ababini babhubhe ngeendlela ezikrokrisayo kule mpela veki!

Pha ngentsimbi yokuqala emini ngeCawe (izolo) umfundi wakwiYunivesithi iWalter Sisulu (WSU) oneminyaka engama-22 ebesaqala ukuzifudumezela umbeko ogqunywe ngefoyili kwi-oveni yeMicrowave. Emva kweentlantsana, kuba ifoyili ingavani neMicrowaves, kuye kwatsho isithonga kwatsha. Lo mfundi wasetyhini uye wabe unabela uqaqaqa emva kokutsha nokutsarhwa ngumsi kwindawo yokuhlala eseCalypso Gardens, eMonti.

Ukanti kwesinye isiganeko, ngoMgqibelo, eMthatha omnye umfundi waseWSU ongumfana oneminyaka eli-19 uphume kwisikroxo sotywala eziqhubela amatakane pha ngezithuba zentsimbi yesibini kusasa (2am). Apha endleleni egodukayo uye watyibilika wawa bhum phez' kwekhoba. Liye lamsika ethangeni, waze wopha kanobom. Uye wabe naye uyalishiya eli. Umzimba wakhe ubhaqwe ekuseni uthe natya kwichibi legazi eChris Hani Park eMthatha.

"Amapolisa asaqhuba uphando ngazo zozibini ezi ziganeko. Kusafuneka kuyokwenziwa noqhaqho lwemizimba ukuze kufumaniseke oyena nobangela wezi ziganeko zokubhubha kwaba bafundi babini. Akukabanjwa mntu kwaye akukho nabantu abaze ngaphambili bathi bazibonele ngawabo amehlo. SinguSAPS besingathanda ukuthi aluhlanga lungehlanga kwiintsapho zaba bafundi," kutsho upoposho olujoliswe koonondaba lwamapolisa ngokuhlwa.

Nabani na onolwazi ngezi ziganeko uyacelwa ukuba ayokuxelela amapolisa okanye awatsalele umnxeba, nokuba akashiyanga gama.

24/05/2026

Oko sizimunca iintupha emva kokuphekelwa nguMastandi onguSpitch

Ibibubumbejembeje nemigcobo yodwa ngale njikalanga eKapa emva kokuba usaziwayo wakwaBhaca, osele exelenga eDubai, ebambe umsitho wesidlo sasemini esaziwa njenge

Kwimenyu bekukho:
- ugeme
- amanqina wehagu
- iJollof yaseNigeria
- umbona ocandwe kane, butternut, salad, rice, chakalaka, iitapile ezikwiMushroom sauce, iColeslaw, iikeyiki zohlobo lweeBrownie kwakunye nomdiliya omfaxangiweyo wodidi yakwaDavid Finlayson ebibhalwe Mastandi.

"Sisiqalo esi. Ningabokuqala ukungcamla ukutya okuthandwa ndim nokuphekwe ndim. Yonke le nto ibimaphuthuphuthu. Two weeks ago, ndivuke ndagqiba kwelokuba mandenze ezi events zezidlo zasemini. Ziyeza eRhawutini, Thekwini nakooGqeberha, Monti. Apho iya khona yonke le nto ziiRestaurant zikaMastandi!" kutsho u Spitch Nzawumbi ngokuhlwa eSi Cantina eWaterfront.

Ibingekokutya kuphela, bekukwakho nencoko noThemba Ngada weenkolo kaNtu nokuKrestu.

"Ayikho into ekuthiwa nguKing Xhosa. Umnombo wethu singamaNguni nguNtu. Sizalwa nguNtu. Yiyo lo nto babesithi singa 'baNtu' abelungu, ngethuba bezama ukusehlulahlula. Le nto ingumNtu, yinto kaNtu ubuqu. YayingumNtu uNtu," kutsho uNgada kwintetho yakhe.

Ukanti nomsasazi waku- UMhlobo Wenene FM 88 - 106 uDumza 'Khwalo' Maswana uye wacula iingoma ezimbalwa phamb' kokuba abalise iintsomi kwanokukhulela eNgqushwa.

"Abantu basezilalini ngabo abandenzayo. Yonke into endiyiyo yinto abayiyo. Yiyo lo nto ndigoduka qho and ndisisa ne-Iziko concert yam pha eNgqushwa. Xa ndigoduka I am not going home to get or learn iContent," kutsho uDumza ngethuba encokola noSpitch ngethuba kuqukunjelwa.

Uphakwe inkunzi kwakhe owayesakuba ngumphathiswa kweli!Pha ngezithuba zentsimbi yethoba ngobusuku (9pm) bangoLwesihlanu ...
24/05/2026

Uphakwe inkunzi kwakhe owayesakuba ngumphathiswa kweli!

Pha ngezithuba zentsimbi yethoba ngobusuku (9pm) bangoLwesihlanu owayesakuba ngumphathiswa weMicimbi yezaNgaphandle neNtsebenziswano kweli nokwangusihlalo we Nelson Mandela University, uNaledi Pandor, ebelungiselela ukulala kwigumbi lakhe ngethuba kumbonzeleka izijamankungwini ezintathu zinxibe iibhalaklava.

Omnye wala madoda uye wayokuxhomisa umakhulu uNaledi lo ngompu, ngethuba omnye waba nqevu aye wayokuvalela umyeni uSharif Pandor (kumfanekiso) kwigumbi langasese. Baye bondula ngokuvunguvunguza le ndlu yolu sapho lakwaPandor eliseVilliera ePitoli.

Bancothule wena thivi (TV), iilaptop zohlobo lweApple, oomakhal'ekhukhwini abazii-iPhone nezinye izinto zexabiso eziphathekayo nezitixo zemoto ubuqu.

Baqokelele konke bayokufaka kwimoto yolu sapho eyiToyota Cross, baze bayibetha yancinci kwangale moto. Imoto le bahamba ngayo umgama ongangeekhilomita ezingama-25, phamb' kokuba bayimise kwilokishi yasePitoli eyaziwa njengeMamelodi East, apho bakhuphe zonke izinto abazibileyo bayishiya apho imoto leyo.

"Imoto sele siyifumene eMamelodi East. Khange kubikwe monzakalo kwesi siganeko kwaye uphando lwethu lusaqhuba. Akukabanjwa mntu," kutsho upoposho lwamapolisa ngesi siganeko.

Enye impelaveki eziseleni kuMan B nookhaphela bakhe!Bambi bathi "tshotsho!" bambi bakhala esimantshiyane, bathi liyelenk...
22/05/2026

Enye impelaveki eziseleni kuMan B nookhaphela bakhe!

Bambi bathi "tshotsho!" bambi bakhala esimantshiyane, bathi liyelenkqe lodwa eli emva kokuba siphinde sanqunyanyiswa isicelo sebheyile sooMlindelwa "Man B" Tyekana, Daluxolo Willie noSiyabonga Masoloku (isibini esi awabanjwa naso eAmalinda, eMonti).

Imini yanamhlanje ibigcwele amagingxigingxi kweli tyala ngoba ooMan B baye bavela kwapha emini kodwa kwakhona ukulibaziseka, kwaze kwanyanzeleka lizomanyelwa ngoku sekuzakutshona ilanga. Nto etheth'ba khange kubekho xesha laneleyo lokuva zonke iingxoxo. Umcuphi weli tyala yena uye wakwazi ukuphefumla elithi makangakhululwa uMan B ngoba angabaleka kwaye neentsapho zamaxhoba wabo zingasebungciphekweni. Ukanti yena uMan B ume kwelokuba baninzi abantu abazakuphulukana nemisebenzi (704) njeng'ba belibele kukumgcina eziseleni.

Esi sicelo sabo sebheyile sakuphinde sisatyelwe kule veki izayo, ngoMvulo, kwakule nkundla inye. Nali inqaku lethu lokuqala elilanda unobangela weli tyala apha: https://www.facebook.com/share/p/18c7kiR2bP/

*Yanga la masela weContent akwa Eastern Cape Daily News angaliboni eli nqaku nomfanekiso.

Address

109 High Street
Matatiele
4730

Telephone

+27399402251

Website

Alerts

Be the first to know and let us send you an email when Iphepha Lam posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Iphepha Lam:

Shortcuts

Share

Category