01/06/2026
Dankie Alida de Bruyn Skrywer vir die pragtige resensie oor Frenette van Wyk - Skrywer/Author se nuutste roman, Om weer te dans!
💛 Voeg hierdie boek op jou leeslys: https://loom.ly/wmVhR1w
Ek deel met julle my Skrywers Mengelmoes Resensie van Frenette van Wyk se boek - Om weer te Dans.
Biografie – Frenette van Wyk
Frennette van Wyk is ’n geliefde Suid-Afrikaanse skrywer wat reeds 26 romanses, 6 superromanses, 4 kortverhale en 2 fantasieverhale vir jeug en jong volwassenes gepubliseer het. Haar eerste boek, Kruisvaart na Liefde, het in 2006 verskyn.
Sy skryf inspirerende verhale vol liefde, hoop, geloof en tweede kanse. Haar nuutste Christelike historiese romans, Stryd vir Liefde en Om weer te dans, vorm deel van ’n reeks wat sy beplan.
Voor haar skryfloopbaan was Frenette ’n hoërskoolonderwyseres in Afrikaans, Engels, Frans en Latyn. Sy woon saam met haar man, Etienne, in Pretoria en geniet dit om te verf, te reis en navorsing vir haar stories te doen.
Outeur: Frenette van Wyk
Boek: Om weer te Dans
“Barabas, kan jy my hartklop hoor? Voel jy die verlange ook in elke polsing van jou hart? Fluister jy soms nog my naam op die wind of in die kwynende strale van die ondergaande son?”
Is dit nie net van die mees romantiese woorde ooit nie? Jy voel sommer die passie waarmee Zivah dit sê. Die omgewing wat Frenette skep, wek dadelik ’n gevoel van nostalgie — die rotsagtige koppies, gespikkelde kleurvolle veldblommetjies, dadels, olywe, karob-, vy- en granaatbome wat oral op die plaas staan waar sy en Barabas mekaar ontmoet en hul liefde verklaar het.
Maar Barabas se verlede en die seer wat die Romeine veroorsaak het, het ’n haat in hom ontwikkel wat tussen hom en Zivah se geluk staan.
In Om weer te dans is Zivah iemand met ’n groot passie vir die maak van parfuum met lelie-olie, mirre, hisop en granaatblom. Sy het ’n ware talent daarvoor. Haar herinneringe aan die intieme oomblikke wat sy en Barabas gedeel het, was haar dryfkrag, maar het haar ook stukkend gelaat. Sy vlug na ’n plaas wat aan Ezra, haar ma se neef, behoort — ’n veilige hawe vir gebroke vroue.
Maar Zivah kry nie rus vir haar hart nie. Sy sien Barabas oral raak — sy sterk manlikheid, die manier waarop hy sy tuniek gedra het. Sy kan nie vergeet hoe sy aanraking ’n polsende hittegolf deur haar laat trek het nie. Ezra ken haar geheime, en sy bystand in haar hartseer is vir haar soos die geur van teerheid, geduld en troos wat sy in roosblaarolie ruik. Sy weet hy sal haar nie in die steek laat nie. Daarom vra sy hom ook om haar te help om die Messias te soek.
Zivah se begeerte om die Messias te sien sodat Hy haar sondes kan vergewe, word al hoe sterker. Die oomblik toe sy sien hoe ’n verlamde se sondes vergewe word en hy opstaan en weer loop, het dieselfde begeerte in haar hart ontstaan. Maar die vrees dat dit nooit vir haar sal gebeur nie, omdat sy glo haar sonde is te groot om vergewe te word, verteer haar.
Terugflitse na Barabas en Zivah se liefde laat jou amper broos voel, asof jy die geur van die olie wat sy spesiaal vir hom gemaak het, self kan ruik. Die soet reuk hang oor elke bladsy. Al leef Barabas ’n gevaarlike lewe en word hy daagliks aan geweld blootgestel, probeer Zivah die stemmetjie van waarskuwing in haar stilmaak, want hy het haar nog altyd veiligheid gebied.
Maar Barabas dra ook sy eie hartseer — ’n pyn wat hom dryf om wraak teen die Romeine te neem. Zivah het ’n vrymoedigheid om haar hart teenoor hom oop te maak. Daar is ’n intieme oomblik waar sy haarself volkome aan hom toewy om hom van haar liefde te verseker. Maar Barabas se drang na wraak neem hom op ’n onbekende pad en ruk hom weg van Zivah af.
Zivah ervaar oorweldigende hartseer, en haar soeke na die Messias vir vergifnis raak net al dringender. Wanneer sy uiteindelik die geleentheid kry om met die Messias te praat, kan jy as leser nie help om self ’n traan af te vee nie. Dit voel asof die Messias reguit met jóú praat. Op daardie manier raak jy deel van Zivah se storie — asof dit eintlik jou eie storie is. Ek het myself telkemale betrap dat ek myself in Zivah sien.
Temidde van haar hartseer en haar voortdurende verlange na Barabas se liefde, word Ezra se wysheid en ondersteuning vir haar van onskatbare waarde. Die dag toe Zivah hoor dat Barabas in hegtenis geneem is, is vir haar ’n geweldige skok. Sy wraak teenoor die Romeine het uiteindelik sy tol geëis.
Dit is ’n dag van pyn en smart waar Zivah besef dat die einde van haar liefdesverhaal met Barabas moontlik aangebreek het. Hulle liefde voel soos ’n bitter olyf. Barabas se bittersoet beloftes en haar verpulpte drome vloei soos kosbare druppels suiwer olie verlore weg.
Die seisoen saam met hom is verby.
Maar God se planne is nie altyd wat ons verwag nie, en hulle kry weer ’n kans. Tog kom daardie kans nie sonder hartseer nie. Sal hulle liefde mekaar weer vind? Sal Barabas en Zivah se liefdesverhaal ’n nuwe seisoen ontvang?
Hierdie storie is gevul met liefde, hoop en geloof. Dit gaan oor baklei vir dit waarin jy glo. Dit is ’n verhaal van vergifnis, tweede kanse en selfs derde kanse. Liefde seëvier altyd.
Hierdie was vir my ’n ongelooflike leeservaring, en ek nooi almal uit om hierdie boek saam met ’n koppie rooibos tee te geniet. Hierdie boek is vir enige iemand wat in romanse glo — ’n verhaal wat jou sal wegvoer na ’n wêreld wat jy nooit ged**k het bestaan nie.
Ek wens ek kon werklik beskryf watter impak Om weer te dans op my gehad het.
Frenette, jy het ’n ongelooflike storie geskryf. Dankie dat jy jou woorde met ons deel.
