16/05/2026
ا ین ایس ایف ہجیرہ کالج کا کنونشن، شرجیل شاہ چیئرمین، سعد احمد سعدی جنرل سیکرٹری منتخب!
شعورِ انقلاب طلبہ کنونشن کی تقریبِ حلف برداری، نومنتخب عہدیداران سے مرکزی جوائنٹ سیکرٹری فیضان عزیز نے حلف لیا
راولاکوٹ () جموں کشمیر نیشنل سٹوڈنٹس فیڈریشن بوائز ڈگری کالج ہجیرہ کی تنظیم نو کے سلسلہ میں "شعورِ انقلاب طلبہ کنونشن" کا انعقاد مقامی گیسٹ ہاؤس میں کیا گیا۔ کنونشن میں آمدہ سال کے لئے این ایس ایف ڈگری کالج کے نئے عہدیداران کو منتخب کرتے ہوئے حلف برداری کی تقریب منعقد کی گئی۔ اس تقریب کے مہمان خصوصی این ایس ایف کے مرکزی صدر بدر رفیق تھے جبکہ سیکرٹری جنرل ارسلان شانی سمیت دیگر مرکزی عہدیداران نے بھی شرکت کی۔ ڈگری کالج ہجیرہ کے نو منتخب عہدیداران سے مرکزی جوائنٹ سیکرٹری فیضان عزیز نے حلف لیا۔ نئے منتخب ہونے والوں میں شرجیل شاہ نے بطور چیئرمین، سعد احمد سعدی جنرل سیکرٹری، حماد نذیر آرگنائزر، سراج خان انچارج سٹڈی سرکل، زکی راجہ میڈیا سیکرٹری، اور عمیر خان نے سیکرٹری فنانس کے طور پر حلف لیا۔ اس موقع پر مرکزی صدر بدر رفیق، ارسلان شانی، فیضان عزیز و دیگر کا کہنا تھا کہ ہم کالج کی نو منتخب قیادت کو اس امید کے ساتھ مبارکباد پیش کرتے ہیں کہ وہ آمدہ سال میں ڈگری کالج کے اندر سٹڈی سرکل کا تسلسل برقرار رکھتے ہوئے نا صرف طلبہ حقوق کی جدوجہد جاری رکھیں گے بلکہ نئے نوجوانوں کو این ایس ایف کی تاریخی جدوجہد اور انقلابی نظریات سے روشناس کرواتے ہوئے مستقبل کی قیادت تراشنے میں اپنا بھرپور کردار ادا کریں گے۔
