15/10/2025
Baie dankie G***s en span.
Artist Village
***snuus: LOS LORRAINE MAAK DIE PLATTELANDSE TONGE LOS!
Aanhangers gaan beslis wonder wat agter die betekenis van Los Lorraine, die nuutste enkelsnit deur die gewilde sanger Marius Willemse, skuil.
Dié liedjie, ’n spanpoging deur liedjieskrywer en vervaardiger Pierre Russouw en Marius self, gaan eintlik glad nie oor wat luisteraars aanvanklik mag d**k nie!
“Die titel, Los Lorraine, beteken nie dat dit stoute lirieke bevat nie,” skerts die sanger oor die betekenis agter hierdie lighartige snit. “Daar is eintlik ’n mooi simbiose tussen die titel en die woorde wat die situasie rondom Lorraine se mannewales verduidelik.”
’n Jong meisie begin by die koöperasie werk op ’n klein dorpie en skielik boer die oompies meer dáár as in hulle lande. Haar goeie verkoopsvermoë laat die bestuurder natuurlik breed glimlag, maar beslis nie die boeretannies wie se mans skielik daagliks aankope moet maak nie!
Oor die inspirasie agter die liedjie, deel die musikant: “Een van my vriende praat altyd van ’n ‘lieplapper’ as hy wil sê dat iemand simpel is. Só het ek toe eendag die idee gekry om te skryf oor Los Lorraine van Lieplappersfontein. Daarna is die liedjie toe gebore en getoonset.”
Marius voel dat die wêreld baie ernstig geword het en as gevolg daarvan het hy besluit om ’n prettige en humoristiese liedjie met ’n tikkie waarheid te sing. Omdat die Afrikaanse volk nog altyd humor kon vind in ernstige situasies, het die sanger gevoel dat dit die regte tyd was vir Los Lorraine om gesig te wys op die platteland.
“Ek was lank laas so opgewonde oor ’n liedjie,” verklap hy oor hoe hy d**k die publiek die snit gaan ontvang. “Ek glo luisteraars gaan die tong-in-die-kies waarheid van klein dorpies in die liedjie net soveel geniet as wat ons het toe ons dit geskryf en opgeneem het.”
Die musiekvideo, opgeneem deur Andrew Roos van Brakmusiek, was een van die lekkerste dinge wat Marius tot dusver in sy loopbaan gedoen het. Die tannies wat vir die manne kwaad geword het en die manne wat met Los Lorraine gedans het, het groot sports veroorsaak in die handelstak van die Frankfort BKB, waar dit verfilm is.
Tans woon die sanger in Frankfort in die Vrystaat saam met sy vrou en twee dogtertjies, waar hy nog steeds in die boer- en restaurantbedryf werk. Hy hoop om die laasgenoemde binnekort uit te brei, maar boer sal altyd een van sy groot passies bly en daarom wil hy meer betrokke raak by die wildbedryf in Limpopo.
Sy bedrywighede stop nie net by sy verskeie besigheidsavonture nie – die sanger is ook deesdae betrokke by Platteland Praatjies, ’n potgooi-produksie waar hy onderhoude voer met plaaslike kunstenaars en persoonlikhede om hulle beter te leer ken. Dié program word voor ’n lewendige gehoor opgeneem, wat beteken dat daar baie interaksie tussen die bekendes en die kykers is.
Verder sien hy ook uit daarna om binnekort nog nuwe musiek vry te stel en om gehore te vermaak: “Elke nuwe vertoning is nogsteeds vir my lekkerder as die vorige een, so ek sien baie uit daarna,” sê hy oor sy opkomende optredes.
Een van sy groot drome is ook onlangs bewaarheid – hy is besig om aan ’n liedjie te werk wat hy saam met Richard van der Westhuizen gaan opneem, en hy hoop om eendag ook die voorreg te hê om saam met Ricus Nel en Steve Hofmeyr te werk.
Dié talentvolle sanger het groot bewondering vir so baie plaaslike sangers wat deesdae musiek vervaardig en hy bly wonder oor hoe hulle dit regkry om so ’n sukses daarvan te maak. Op ’n internasionale vlak bly sangers soos Neil Diamond, Chris Stapleton en die vele manne en vroue in die Country-musiekgenre nog helde vir hom.
Wanneer dit kom by kunstenaars wat die grootste invloed op sy musiek gehad het, is plaaslike name soos Hugo, Armand Steenkamp, Ricus Nel en Theuns Jordaan bo-aan die lys omdat hulle musiek vir die sanger tydloos is.
Dis algemene kennis dat die musiekbedryf uitdagend kan wees en hy meen: “Ek het die laaste jaar geleer om nederig te bly. Die kompetisie is groot en ’n mens kan in ’n oogwink in die kollig wees vir die verkeerde redes.”
Marius glo dat hy as kunstenaar net moet aanhou doen waarmee hy goed is, by sy woord hou en elke dag moet streef om beter te wees as die vorige dag.
’n Wyse persoon het eendag vir hom gesê dat ’n kunstenaar net so goed is soos sy laaste vertoning en dis iets wat hy altyd saam met hom sal dra.
Los Lorraine se humoristiese aanslag sal die atmosfeer om die braaivleisvuur opkikker en die voete laat jeuk op die dansvloer.
Die enkelsnit is nou beskikbaar op alle digitale stromingsplatforms.
Artist Village Marius Willemse
