27/12/2025
𝗟𝗘𝗪𝗘𝗡𝗦𝗟𝗘𝗦𝗦𝗘 𝟮𝟬𝟮𝟱
Aan die einde van elke jaar nooi ek jou in en reflekteer ons saam oor die jaar en sy dinge. Dit was 'n jáár...hoe gaan dit régtig met jou?
Deur die loop van die jaar deel ons elke maand 'n lys lewenslesse uit Ons Taaltuin. In Desember kyk ons terug en kies ons een lewensles uit elke maand wat vir ons uitgestaan het. Hierdie jaar se lewenslesse lyk só:
𝐉𝐚𝐧𝐮𝐚𝐫𝐢𝐞:
As jy almal se klippe saam met jou gaan dra, gaan jy sink. Soms is dit nie jou verantwoordelikheid of jou plek om probleme op te los nie.
𝐅𝐞𝐛𝐫𝐮𝐚𝐫𝐢𝐞:
‘n Grootmens-geheim: Dié wat werk hoef nie te sê dat hulle die werk gedoen het nie. Die uitsette sal die praatwerk doen. Volharding oortref talent.
𝐌𝐚𝐚𝐫𝐭:
Verrassing en verbasing: Jy gaan hulp ontvang by die mense van wie jy dit die minste verwag.
𝐀𝐩𝐫𝐢𝐥:
Wees versigtig vir jou eie aannames. Jy is nie altyd reg nie.
𝐌𝐞𝐢:
Verjaardae maak nie vet nie, dit maak vol.
𝐉𝐮𝐧𝐢𝐞:
Jy hoef nie jouself toeganklik tot die verlede te maak nie. Jy mag 'n hoofstuk afsluit en van die karakters agterlaat.
𝐉𝐮𝐥𝐢𝐞:
Om vrae te vra is ’n teken van wysheid, nie onkunde nie.
𝐀𝐮𝐠𝐮𝐬𝐭𝐮𝐬:
Net 'n herinnering: Die lewe vind buite jou foonskerm plaas.
𝐒𝐞𝐩𝐭𝐞𝐦𝐛𝐞𝐫:
Rykdom word nie gemeet aan wat jy het nie, maar aan wat jy kan los.
𝐎𝐤𝐭𝐨𝐛𝐞𝐫:
Vir dié wat twyfel: Bid eers, praat later.
𝐍𝐨𝐯𝐞𝐦𝐛𝐞𝐫:
Wees betroubaar en nie voorspelbaar nie. Voorspelbaarheid maak jou vervangbaar.
𝐃𝐞𝐬𝐞𝐦𝐛𝐞𝐫:
Moenie jou bekwaamheid met selfstandigheid verwar nie. Jy hoef nie alles op jou eie te doen nie. Laat mense toe om jou te help.
Geniet jou laaste Saterdag vir die jaar!
- die Stigter
©Ineffable Digital Designs 2025
