26/06/2026
U-R600 million awusetshenziswe ukubaphindisela emazweni abo'
UMHOLI wenhlangano elwa nabokufika abakuleli ngokungemthetho, uNkk Jacinta Ngobese-Zuma ubuze ukuthi kungani uhulumeni engasebenzisi lo R600 million okuthiwa uzosebenza ukuqapha ezokuphepha ngoJuni 30, ukuhambisa abaseMalawi abaduve eThekwini.
Usho lokhu ngesikhathi enze isithangami sabezindaba eGoli, ukukhuluma ngamaphuzu ehlukene ngodaba lwabokufika, abakuleli ngokungemthetho.
Uthe kuyabakhathaza ukuthi akekho noyedwa umuntu ofuna ukubuza ukuthi yenzeke kanjani inhlekelele yokuthi kugcine kukhona izinkumbi zabokufika baseMalawi ezibonakala eThekwini.
“Ngalo R600 million kungani kungasheshiswa eyokuhanjiswa kwalaba bantu eMalawi,” kusho uJacinta.
Uthe ziyammangaza izexwayiso zokuthi uma kungaba khona okuphambene okwenzeka ngalolu suku, kuyosolwa bona bengabahleli bemibhikisho. Uthe akukwazi ukuthi kungaba nenkulumo ekanje ebhekiswe kubo.
“Uma uhulumeni ezokwazi ukuchitha u-R600 million, kufanele awusebenzele, asikhombise ukuthi uzokwazi ukuvikela izwe. Ngeke sifike sikhale ngemingcele evuzayo nsuku zonke bese uhulumeni ahluleke ukusivikela,” kusho uJacinta.
Ubuze ukuthi uma uhulumeni ethi uzosola bona uma kungahle kube khona umonakalo ozoba khona ngoJuni 30, ubani othatha umthwalo wezingane eseziphenduke imihambima ngenxa yezidakamizwa, abantu abashushumbiswayo nokunye?
“Uma kukhona umuntu ofuna ukuqala akhombe imimwe kwabanye, akaqale abheke labo ababa yimbangela yale nkinga esibhekene nayo njengamanje yabokufika abangekho emthethweni,” kusho uJacinta.
Ugcizelele eyokuthi kade becula iculo lokuthi bona abazokwenza ngalolu suku ukumasha ezitaladini zezwe.
Ephendula eyokuthi izinhlaka zikahulumeni, okufaka phakathi ngisho noMengameli Cyril Ramaphosa, zithi umnqamulajuqu wangoJuni 30 awukho emthethweni, uJacinta uthe ufuna ukukucacisa ukuthi nakuba waqhamuka noPhakel’umthakathi Ndabandaba, kodwa iningi lezakhamuzi zakuleli zakhombisa ukuweseka, nazo zashumayela ivangeli elifanayo.
“UJuni 30 usuku olwashiwo ukugqugquzela ukuthi abakwamanye amazwe, abakuleli ngokungemthetho, bahambe babuyele emazweni abo. Lokhu kweza njengoba uhulumeni wethu uhlale ekhala ngokuthi kuyizindleko ezinkulu ukubahambisa,” kusho uJacinta.
Uthe kuyammangaza ukuthi uhulumeni agqamise eyokuthi akukho emthethweni ukutshela abantu abakuleli ngokungemthetho, ukuthi abahambe baye emazweni abo.
“Yini engekho emthethweni ngalokho? Ngoba lolu wusuku olumenyezelwe ukuthi bagqugquzelwe ukuthi baye emazweni abo?,” usho kanje.
Uthe kuyamangaza nokuthi wonke umuntu useqala ukuba novalo manje ekubeni lolu suku lwamenyezelwa ngo-Ephreli.
Uthe balweseka lolu suku ngoba baseduze nemiphakathi okuyiyona ekhahlamezeke kakhulu ngalolu daba.
Uthe abazokwenza bona ngoJuni30 ukwenza imibhikisho njengenjwayelo ezindaweni ezehlukene. Uthe amamashi azobe esemthethweni njengoba izinhlangano abasebenzisana nazo, zizifakile izicelo ngokusemthethweni. Uthe basazomemezela kahle ukuthi amamashi azobe ekuziphi izindawo.
Uthe indaba yokukhala ngabokufika abakuleli ngokungemthetho, isikhalo seminyaka.
Uchithe eyokuthi banabaxhasi ababeseka ngemali esithe, wathi kuyakhathaza ukuthi kucatshangwe ukuthi umuntu omnyama ukwazi ukusukuma amele into ethize ngoba nakhu ekhokhelwe.
“Ukhona yini oseke wasicela izitatimende zasebhange, ukuze azibonele ukuthi lawa amampunge? Imali siyinikelelwa abantu. Yishoni sininike izitatimende khona namuhla, nizibonele,” kusho uJacinta.
Uchithe eyokuthi balwa nabokufika ngokungemthetho abanebala elimnyama kuphela. Wathi lokhu kuyabaxaka ngoba iningi lezipaza emalokishini liphethwe abaseBangladesh. Wathi nakhona odabeni lwezipaza, babonakele belwisana nalokhu.
Ebhekise ezinhlanganweni ezibasolayo ngokulwa eyabokufika abakuleli ngokungemthetho, uthe leli yithuba lokuthi ziyeke ukubanika ukudla, kodwa zikhokhele amabhasi okubahambisa emazweni abo.
