What are the opening hours?

Monday 08:30 - 04:30 Tuesday 08:30 - 16:30 Wednesday 08:30 - 16:30 Thursday 08:30 - 16:30 Friday 08:30 - 16:30

https://www.facebook.com/998534523337006/

TouwsNuus, 1, Touwsrivier (2026)

06/09/2026

🟢 𝐃𝐄 𝐊𝐑𝐔𝐈𝐍𝐄 𝐒𝐊𝐎𝐎𝐋𝐊𝐎𝐎𝐑-𝐑𝐄𝐔̈𝐍𝐈𝐄 𝐔𝐈𝐓𝐆𝐄𝐒𝐓𝐄𝐋

Die organiseerders van die De Kruine Skoolkoor-reünie-sangaand het aangekondig dat die geleentheid, wat vir 26 September beplan was, tot verdere kennisgewing uitgestel is.

’n Nuwe datum sal aangekondig word sodra dit bevestig is.

Die organiseerders vra om verskoning vir enige ongerief wat die uitstel mag veroorsaak en bedank almal vir hul geduld en ondersteuning.

* TouwsNuus 𝑠𝑎𝑙 𝑣𝑒𝑟𝑑𝑒𝑟𝑒 𝑖𝑛𝑙𝑖𝑔𝑡𝑖𝑛𝑔 𝑒𝑛 𝑑𝑖𝑒 𝑛𝑢𝑤𝑒 𝑑𝑎𝑡𝑢𝑚 𝑠𝑜𝑑𝑟𝑎 𝑑𝑖𝑡 𝑏𝑒𝑠𝑘𝑖𝑘𝑏𝑎𝑎𝑟 𝑖𝑠, 𝑚𝑒𝑡 𝑙𝑒𝑠𝑒𝑟𝑠 𝑑𝑒𝑒𝑙.

04/09/2026

🟢 𝐓𝐎𝐔𝐖𝐒𝐑𝐈𝐕𝐈𝐄𝐑𝐃𝐄𝐑 𝐊𝐑𝐘 𝐏𝐑𝐎𝐕𝐈𝐍𝐒𝐈𝐀𝐋𝐄 𝐄𝐑𝐊𝐄𝐍𝐍𝐈𝐍𝐆 𝐕𝐈𝐑 𝐋𝐄𝐈𝐄𝐑𝐒𝐊𝐀𝐏

Die Touwsrivierder en skoolhoof van Hoërskool Laingsburg, Riaan Carolison , is verlede week as die eerste naaswenner in die kategorie Excellence in Secondary School Leadership deur die Wes-Kaapse Onderwysdepartement aangewys.

Vir Carolison, ’n voormalige skoolhoof van De Kruine Sekondêr in Touwsrivier, is die provinsiale erkenning veel meer as net ’n toekenning. Dit is ’n bevestiging van ’n lewenspad wat in Touwsrivier begin het – ’n pad wat deur geloof, harde werk, diensbaarheid en die mense wat van jongs af in hom geglo het, gevorm is.

Hoewel die erkenning hom aanvanklik oorweldig het, was sy eerste reaksie een van dankbaarheid. “My eerste gedagte was een van dankbaarheid teenoor God. Ek glo opreg dat God my op hierdie pad geplaas het en my deur elke fase van my lewe gelei het,” het Carolison gesê.

Vir hom gaan die erkenning egter nie bloot oor ’n persoonlike prestasie nie. “Ek sien dit nie net as ’n persoonlike toekenning nie, maar as erkenning vir die hele Hoërskool Laingsburg-gemeenskap.”

Volgens Carolison is ’n skoolhoof nooit alleen verantwoordelik vir ’n skool se sukses nie. Hy het die personeel, leerders, ouers, skoolbeheerliggaam en die breër Laingsburg-gemeenskap bedank vir hul rol in die skool se ontwikkeling.

“Hierdie erkenning is nie myne alleen nie. Ek deel dit met almal wat deel is van my reis, almal wat in my geglo het en almal wat saam met my werk om elke dag ’n verskil in die lewens van ons leerders te maak.”

’𝐧 𝐒𝐞𝐮𝐧 𝐯𝐚𝐧 𝐓𝐨𝐮𝐰𝐬𝐫𝐢𝐯𝐢𝐞𝐫

Carolison se sukses dra besondere betekenis vir Touwsrivier, die dorp waar hy grootgeword het en waar hy volgens hom die waardes ontwikkel het wat vandag steeds sy leierskap bepaal.

“Ek is baie trots daarop om ’n Touwsrivierder te wees. My grootwordjare in Touwsrivier het my gevorm en my baie belangrike waardes geleer – waardes soos respek, harde werk, nederigheid, deursettingsvermoë en omgee vir ander mense.”

Hy onthou veral die rol wat sy ouers en grootouers in sy ontwikkeling gespeel het.

“My pappa, Oupa Johnny, en my mamma, Ouma Sophie, was die hoekstene van my lewe. Hulle was nie net die reisbeplanners van my lewe nie, maar ook die twee mense wat altyd in my bly glo het. Hulle het my geleer om nie bang te wees om groot te droom nie, maar terselfdertyd nederig te bly en hard te werk vir dit wat jy wil bereik,” sê hy.

Die plaaslike skole het eweneens ’n belangrike rol in sy ontwikkeling gespeel. Carolison het reeds as jongmens verskeie leierskapsgeleenthede gekry, onder meer as sportkaptein, hoofseun en voorsitter van die Verteenwoordigende Raad van Leerders (VRL).

“Hierdie geleenthede het my baie vroeg reeds geleer van verantwoordelikheid, diensbaarheid, spanwerk en die invloed wat ’n leier op ander mense kan hê.”

Ook die Lutherse Kerk het volgens hom ’n belangrike rol in sy vorming gespeel en bygedra tot sy geestelike ontwikkeling en begrip van diensbaarheid.

Hierdie vroeë ervarings het ’n blywende invloed gehad op die manier waarop hy vandag ’n skool lei. “Vir my gaan ’n skool nie net oor akademiese uitslae nie. Dit gaan oor mense. Dit gaan daaroor om elke leerder ’n geleentheid te gee om te groei en te glo dat hulle, ongeag waar hulle vandaan kom, ’n toekoms kan bou.”

𝐋𝐞𝐢𝐞𝐫𝐬𝐤𝐚𝐩 𝐰𝐚𝐧𝐧𝐞𝐞𝐫 𝐝𝐢𝐧𝐠𝐞 𝐦𝐨𝐞𝐢𝐥𝐢𝐤 𝐫𝐚𝐚𝐤

Vir Carolison is goeie leierskap egter nie net sigbaar wanneer ’n skool sukses vier nie. Dit word volgens hom juis getoets wanneer dinge moeilik raak. “Een van die grootste uitdagings as skoolhoof is om ’n skoolgemeenskap deur moeilike tye te lei terwyl jy steeds hoop, stabiliteit en ’n duidelike visie moet behou.”

Hy sê onderwysleiers word daagliks gekonfronteer met uitdagings wat nie noodwendig in prestasieverslae sigbaar is nie – van beperkte hulpbronne en die uiteenlopende sosiale omstandighede van leerders tot die druk waaronder personeel en skole funksioneer.

Hierdie uitdagings het hom geleer dat leierskap nie beteken dat ’n mens altyd al die antwoorde moet hê nie. “Ware leierskap beteken soms dat jy moet luister, ondersteuning moet vra, moeilike besluite moet neem en steeds kalm en gefokus moet bly wanneer dinge nie volgens plan verloop nie.”

Sy geloof het hom volgens hom ook deur moeilike tye gedra. “Dit het my geleer dat ’n mens nie alles alleen hoef te dra nie en dat daar waarde is in geloof, gebed en vertroue wanneer die pad moeilik raak.”

’𝐧 𝐁𝐨𝐨𝐝𝐬𝐤𝐚𝐩 𝐚𝐚𝐧 𝐓𝐨𝐮𝐰𝐬𝐫𝐢𝐯𝐢𝐞𝐫 𝐬𝐞 𝐣𝐨𝐧𝐠𝐦𝐞𝐧𝐬𝐞

Wanneer Carolison terugkyk op sy reis vanaf Touwsrivier tot by die hoof van ’n hoërskool en nou ’n provinsiale erkenning vir sy leierskap, is hy dalk die trotsste daarop dat hy nooit vergeet het waar hy vandaan kom nie.

“Ek bly trots op waar ek vandaan kom en op die mense, skole, kerk en gemeenskap wat ’n rol gespeel het om my te vorm.”

Sy reis het hom ook geleer dat leierskap nie oor ’n titel gaan nie, maar oor diensbaarheid en die verskil wat ’n mens in ander se lewens kan maak.

En daarom het hy ’n eenvoudige maar kragtige boodskap vir jongmense in Touwsrivier en ander kleiner gemeenskappe: “Jou beginpunt bepaal nie jou eindpunt nie. Moet nooit d**k dat waar jy vandaan kom, bepaal hoe ver jy kan gaan nie,” sê hy.

Hy moedig jongmense aan om in God en hulself te glo, hard te werk, bereid te wees om te leer en nie moed op te gee wanneer dinge moeilik raak nie. “Jou drome mag dalk groter wees as jou huidige omstandighede – en dit is heeltemal reg.”

Volgens Carolison gebeur sukses nie oornag nie, maar is dit die gevolg van klein besluite, harde werk, dissipline, geloof en volharding oor ’n lang tyd.

Vir dié Touwsrivierder is sy provinsiale erkenning daarom nie ’n eindbestemming nie, maar eerder ’n herinnering dat daar steeds werk is om te doen. “Daar is altyd nog werk om te doen, nog kinders om te inspireer en nog doelwitte om te bereik.”

Sy grootste wens is dat jongmense sal aanhou droom, aanhou werk en glo dat hulle ook ’n verskil in hul gemeenskappe en die wêreld kan maak.

“Soms moet jy net die moed hê om die eerste tree te gee, vertrou op die pad wat voorlê en nooit ophou glo in die persoon wat jy kan word nie.”

02/09/2026

🟢 𝐓𝐎𝐔𝐖𝐒𝐑𝐈𝐕𝐈𝐄𝐑-𝐑𝐀𝐀𝐃𝐒𝐋𝐈𝐃 𝐑𝐔𝐒𝐒𝐄𝐋 𝐉𝐎𝐇𝐍𝐒𝐎𝐍 𝐔𝐈𝐓 𝐏𝐎𝐒 𝐕𝐄𝐑𝐖𝐘𝐃𝐄𝐑 𝐍𝐀́ 𝐎𝐍𝐃𝐄𝐑𝐒𝐎𝐄𝐊

Touwsrivier se raadslid, Russel Johnson, wat Wyk 1 van die Breedevallei Munisipaliteit - Breede Valley Municipality verteenwoordig, is met ingang van 1 September 2026 uit sy pos verwyder ná dissiplinêre verrigtinge rakende bewerings van growwe wangedrag, het die Breedevallei-munisipaliteit Woensdag (2 September) in ’n verklaring bevestig.

Die besluit volg nadat ’n Spesiale Komitee wat verantwoordelik is vir dissiplinêre aangeleenthede rakende raadslede, die saak ondersoek en oorweeg het.

Volgens die munisipaliteit is die dissiplinêre proses volgens die toepaslike prosedures gevoer en is beide partye die geleentheid gebied om deur regsverteenwoordigers verteenwoordig te word en ten volle aan die verrigtinge deel te neem.

Johnson betwis egter die proses wat tot sy verwydering gelei het en sê hy is reeds met sy regspan in gesprek.

In ’n openbare verklaring aan die inwoners van Touwsrivier sê Johnson daar is “ernstige kommer” oor die vraag of ’n billike en behoorlike proses gevolg is.

“Die besluit en die prosesse wat gevolg is, sal deur die toepaslike regsweë betwis word,” het Johnson gesê.

Die Spesiale Komitee het Johnson volgens die munisipaliteit skuldig bevind aan die aanklagte teen hom en daarna ’n verslag en aanbeveling aan die Raad voorgelê. Die Raad het die aanbevelings oorweeg en daarvolgens besluit, waarna sy verslag en besluit binne die voorgeskrewe tydperk aan die LUR vir Plaaslike Regering voorgelê is.

Die munisipaliteit het gesê die LUR vir Plaaslike Regering, Anton Bredell, het op 1 September sy besluit formeel aan die Kantoor van die Speaker meegedeel en Johnson se verwydering uit sy pos bevestig.

Die verwydering is volgens die munisipaliteit ingevolge die toepaslike bepalings van die Gedragskode vir Raadslede, soos vervat in die tersaaklike Bylae tot die Wet op Plaaslike Regering: Munisipale Strukture, 1998 (Wet 117 van 1998), soos gewysig, uitgevoer.

Die munisipaliteit het ook beklemtoon dat die saak volgens die toepaslike wetgewende raamwerk en die beginsels van prosedurele billikheid, deursigtigheid en aanspreeklikheid hanteer is.

Johnson beweer verder dat die saak “polities gedrewe” was en dat dit volgens hom juis daarom deur die behoorlike regsproses getoets moet word.

“Dit is groter as ek persoonlik,” het Johnson gesê, met verwysing na wat hy beskryf as die Touwsrivier-gemeenskap se reg om gehoor te word, gerespekteer te word en ernstig opgeneem te word.

Johnson het gesê hy sal “elke wettige weg” tot sy beskikking gebruik om die besluit te betwis en het onderneem om die gemeenskap op hoogte te hou namate die proses vorder.

“Hierdie stryd is nie verby nie,” het hy gesê.

TouwsNuus het die munisipaliteit om verdere besonderhede oor die dissiplinêre proses genader, insluitend die aard en aantal aanklagte wat teen Johnson ingebring is, asook op watter aanklagte hy skuldig bevind is.

Die munisipaliteit het egter aangedui dat dié inligting nie bekend gemaak sal word nie.

“Ongelukkig kan ons nie verdere inligting bekend maak of spesifieke besonderhede rakende die ondersoek verskaf nie,” het munisipale woordvoerder John Bulani namens die munisipaliteit aan TouwsNuus gesê.

“Op hierdie stadium kan ons slegs die uitkoms van die ondersoek kommunikeer, soos dit in die verklaring wat reeds uitgereik is, uiteengesit is.”

Die munisipaliteit het dus nie bekend gemaak hoeveel aanklagte teen Johnson ingebring is, wat die spesifieke aard daarvan was of op watter aanklagte hy skuldig bevind is nie.

01/09/2026

🟢 𝟐𝟎 𝐆𝐁𝐕-𝐆𝐄𝐕𝐀𝐋𝐋𝐄 𝐋𝐄𝐈 𝐓𝐎𝐓 𝐖𝐄𝐑𝐊𝐒𝐖𝐈𝐍𝐊𝐄𝐋 𝐕𝐈𝐑 𝐕𝐑𝐎𝐔𝐄 𝐈𝐍 𝐓𝐎𝐔𝐖𝐒𝐑𝐈𝐕𝐈𝐄𝐑

Die Departement van Maatskaplike Ontwikkeling op Touwsrivier het verlede week ’n driedaagse werkswinkel vir 30 vroue aangebied nadat 20 gevalle van geslagsgebaseerde geweld (GBV) tussen April en Augustus 2026 na die Departement verwys is.

Die werkswinkel het van Woensdag 26 Augustus tot Vrydag 28 Augustus by die Touwsrivier-sportkompleks (Poenie-baan) plaasgevind.

Die 30 vroue is vooraf genooi om die werkswinkel by te woon. Die program was gerig op vroue wat GBV ervaar het, asook vroue wat geïdentifiseer is as persone wat die risiko loop om geweld en ander maatskaplike probleme te ervaar.

Volgens Esther Lewis, hoof van kommunikasie by die Departement van Maatskaplike Ontwikkeling, het die Departement se behoeftebepaling gewys dat baie van hierdie vroue met uitdagings soos trauma, lae selfbeeld, sosiale isolasie, finansiële probleme, beperkte werksgeleenthede en ’n gebrek aan ondersteuning te doen gehad het.

“Die werkswinkel poog dus om nie slegs die behoefte aan emosionele ondersteuning en traumaverwerking aan te spreek nie, maar ook om vroue met praktiese kennis en lewensvaardighede toe te rus,” het Lewis gesê.

Die doel was om deelnemers te help om hul selfvertroue en veerkragtigheid te versterk, meer onafhanklik te word en ondersteunende verhoudings met ander vroue in die gemeenskap te bou.

Deelnemers het onder meer geleer oor gesonde verhoudings, persoonlike grense, selfbeeld, finansiële bestuur en die stel van persoonlike doelwitte. Hulle is ook ingelig oor ondersteunings- en verwysingsdienste wat beskikbaar is.

𝐅𝐢𝐧𝐚𝐧𝐬𝐢𝐞̈𝐥𝐞 𝐛𝐞𝐦𝐚𝐠𝐭𝐢𝐠𝐢𝐧𝐠

Finansiële bemagtiging was een van die belangrike dele van die werkswinkel. Nedbank en Old Mutual is spesifiek genooi om finansiële bemagtigingsessies aan die deelnemers aan te bied.

Die sessies het gefokus op basiese finansiële kennis, begrotings, spaar, verantwoordelike finansiële besluite en finansiële beplanning. Daar is ook gekyk na moontlike werksgeleenthede en entrepreneurskap.

Lewis het gesê finansiële afhanklikheid kan dit vir vroue moeilik maak om ’n gewelddadige of onveilige verhouding te verlaat.

“Wanneer ’n persoon beperkte toegang tot inkomste, spaargeld, werksgeleenthede of finansiële hulpbronne het, kan sy voel dat sy geen ander keuse het as om in ’n onveilige situasie te bly nie,” het Lewis gesê.

Volgens haar was finansiële bemagtiging daarom nie net belangrik vir deelnemers se geldsake nie, maar ook vir hul veiligheid en onafhanklikheid.

𝐎𝐧𝐝𝐞𝐫𝐬𝐭𝐞𝐮𝐧𝐢𝐧𝐠 𝐧𝐚́ 𝐝𝐢𝐞 𝐰𝐞𝐫𝐤𝐬𝐰𝐢𝐧𝐤𝐞𝐥

Die Departement het gesê deelnemers sou ná die werkswinkel, waar nodig, steeds toegang tot ondersteuning hê.

Dit kon verdere maatskaplikewerkdienste, berading en psigososiale ondersteuning insluit, asook verwysings na gesondheids- en geestesgesondheidsdienste.

Deelnemers kon ook na vaardigheidsontwikkeling, opleiding en moontlike werksgeleenthede verwys word.

Die werkswinkel se tema was “Fix Each Other’s Crowns – Women Supporting Women”.

Volgens Lewis was die boodskap dat ondersteuning nie noodwendig met die einde van die werkswinkel moes stop nie, en dat die vroue mekaar ook daarna kon ondersteun.

“Die kernboodskap is dat deelnemers nie deur hul traumatiese ervarings gedefinieer word nie en dat hulle die vermoë het om te genees, te groei, hul lewens te herbou en ander vroue op dieselfde pad te ondersteun,” het Lewis gesê.

23/08/2026

🟢 𝐂𝐎𝐌𝐏𝐀𝐒𝐒𝐈𝐎𝐍𝐀𝐓𝐄 𝐇𝐄𝐀𝐑𝐓𝐒 𝐓𝐎𝐔𝐖𝐒𝐑𝐈𝐕𝐈𝐄𝐑 𝐕𝐈𝐄𝐑 𝟔 𝐉𝐀𝐀𝐑 𝐒𝐄 𝐆𝐄𝐌𝐄𝐄𝐍𝐒𝐊𝐀𝐏𝐒𝐈𝐌𝐏𝐀𝐊

Sowat 880 inwoners van Touwsrivier is verlede Donderdag, 20 Augustus, tydens Compassionate Hearts Touwsrivier (CHT) se sesde verjaardag met ’n spesiale maaltyd bederf.

Die plaaslike organisasie het sy sesde bestaansjaar gevier deur sy sowat 18 vrywilligers te bedank en erkenning te gee aan die mense en organisasies wat oor die jare tot sy werk in die gemeenskap bygedra het.

“Ons het hierdie geleentheid gebruik om ons vrywilligers te bedank en te vereer vir hul harde werk en onbaatsugtige toewyding aan die gemeenskap. Hulle doen dit sonder enige vergoeding, terwyl hulle ook hul eie gesinne en uitdagings het,” het Rashaad Baker, stigter en voorsitter van CHT, gesê.

Volgens Baker het elke vrywilliger ’n sertifikaat van waardering ontvang.

Sowat 180 kinders en 700 volwassenes het die spesiale maaltyd ontvang. “Hierdie geleentheid sou nie moontlik gewees het sonder Touwsrivier Toerisme en Ilitha Labantu, wat die hoender vir ons geborg het nie,” het Baker gesê.

𝐕𝐚𝐧 𝐭𝐨𝐞𝐛𝐫𝐨𝐨𝐝𝐣𝐢𝐞𝐬 𝐭𝐨𝐭 𝟖 𝟎𝟎𝟎 𝐦𝐚𝐚𝐥𝐭𝐲𝐞 𝐩𝐞𝐫 𝐦𝐚𝐚𝐧𝐝

Wat tydens die Covid-19-pandemie begin het met toebroodjies vir ’n groep honger kinders, het oor ses jaar tot ’n volwaardige gemeenskapsorganisasie gegroei.

CHT voorsien volgens Baker tans maandeliks sowat 8 000 gekookte maaltye aan mense in nood, insluitend bejaardes, kinders en mense met gestremdhede.

“Ons het in die hartjie van Covid begin deur eendag vir ’n groep kinders wat vir kos gevra het, toebroodjies te gee. Later het volwassenes ook bygekom en by ons aangeklop vir iets om te eet,” het hy vertel. “Ons het die behoefte gesien en besluit om iets daaraan te doen.”

Baker sê CHT se werk strek vandag verder as voedselvoorsiening.

“Ons doen meer as net om mense te voed. Ons is ook betrokke by gemeenskapsontwikkeling. Ons het ’n groentetuin by Steenvliet Primêr en bied tuinbou-opleiding aan mense wat hul eie groentetuine wil begin.”

𝐍𝐮𝐰𝐞 𝐤𝐨𝐦𝐛𝐮𝐢𝐬 𝐞𝐧 𝐯𝐨𝐞𝐝𝐬𝐞𝐥𝐡𝐮𝐥𝐩

In 2024 het CHT, met die hulp van die MAX-stigting en Gift of the Givers, ’n kombuis ter waarde van R550 000 opgerig.

Volgens Baker is die kombuis volledig toegerus en van sonpanele voorsien. Die organisasie ontvang ook ondersteuning om elke drie maande voedselpakkies aan sowat 600 inwoners te versprei.

“Dit is nogal moeilik om te fasiliteer, want ons moet die begunstigdes gereeld roteer sodat ons elke keer ander mense kan help,” het Baker gesê.

Die organisasie bied ook gesondheidsinisiatiewe in samewerking met Gift of the Givers aan. Dit sluit tandheelkundige en oogkundige dienste in wat na die dorp gebring word.

𝐅𝐨𝐤𝐮𝐬 𝐨𝐩 𝐣𝐨𝐧𝐠𝐦𝐞𝐧𝐬𝐞

Baker sê CHT se grootste bekommernis is die toekoms van jongmense in Touwsrivier.

“Ons grootste kommer is die jongmense in ons dorp. Ons beoog om ontwikkelingsprogramme aan te bied om hulle te bemagtig om verder te studeer en geleenthede buite die dorp te verken.”

𝐄𝐫𝐤𝐞𝐧𝐧𝐢𝐧𝐠 𝐚𝐚𝐧 𝐨𝐧𝐝𝐞𝐫𝐬𝐭𝐞𝐮𝐧𝐞𝐫𝐬

Volgens Baker sou CHT se werk oor die afgelope ses jaar nie moontlik gewees het sonder die ondersteuning van talle borge, organisasies en individue nie.

CHT se sesde bestaansjaar is daarmee nie net ’n viering van die organisasie se geskiedenis nie, maar ook van die vrywilligers, vennote en gemeenskapslede wat oor die jare deel van sy werk geword het.

13/08/2026

🟢𝐌𝐀 𝐄𝐍 𝐋𝐄𝐖𝐄𝐍𝐒𝐌𝐀𝐀𝐓 𝐕𝐄𝐑𝐒𝐊𝐘𝐍 𝐈𝐍 𝐓𝐎𝐔𝐖𝐒𝐑𝐈𝐕𝐈𝐄𝐑-𝐋𝐀𝐍𝐃𝐃𝐑𝐎𝐒𝐇𝐎𝐅 𝐍𝐀́ 𝐊𝐈𝐍𝐃 𝐒𝐄 𝐃𝐎𝐎𝐃

’n Ma van ’n sewejarige kind en haar lewensmaat het Donderdag in die Touwsrivier-landdroshof verskyn op aanklagte van moord, verkragting en kinderverwaarlosing ná die dood van die kind.

Volgens konstabel Ndakhe Gwala, 'n Wes-Kaapse provinsiale polisiewoordvoerder, is die twee verdagtes in hegtenis geneem in verband met die kind se dood in Belmastraat, Touwsrivier, op Maandag 3 Augustus.

Die polisie sê die sewejarige kind het verskeie beserings opgedoen, waaronder kneusplekke en ’n gebreekte been. Die SAPD het ook bevestig dat die kind anaal seksueel gepenetreer is.

Die omstandighede rondom die kind se dood word steeds ondersoek.

12/08/2026

🟢 𝐒𝐊𝐎𝐎𝐋𝐆𝐄𝐌𝐄𝐄𝐍𝐒𝐊𝐀𝐏 𝐈𝐍 𝐒𝐊𝐎𝐊 𝐍𝐀 𝐆𝐄𝐋𝐈𝐄𝐅𝐃𝐄 𝐎𝐏𝐒𝐈𝐆𝐓𝐄𝐑 𝐒𝐓𝐄𝐑𝐅

Die Touwsrivier-skoolgemeenskap is in skok en rou gedompel ná die skielike sterfte van die hoofopsigter by Steenvliet Primêr.

Johan “Hannie-Boy” Januarie (57) het Vrydagaand, 7 Augustus, vermoedelik aan ’n hartaanval gesterf.

“Ons is steeds in skok en vat dit dag vir dag. Sy sterfte laat ’n groot leemte by die skool,” het Peter Jaftha, skoolhoof van Steenvliet Primêr, vandeesweek aan TouwsNuus gesê.

Jaftha voeg by: “Hy was nie net ’n opsigter nie. Hy was vir die afgelope 18 jaar ons nutsman, veiligheidsbeampte, hekkontroleerder en staatmaker. Daar is seker goed wat net hy kon doen. Ons gaan hom reeds baie mis.”

Januarie se weduwee, Johnique (34), sê dit “voel steeds onwerklik. Ek weet nie hoe ek en die kinders die lewe sonder hom gaan aanpak nie.”

Johnique vertel dat Johan Vrydagoggend kliniek toe is nadat hy ’n ruk lank oor pyn in sy bors gekla het.

“Hy is aanvanklik dokter toe nadat hy gekla het oor ’n abses in sy mond en die pyn oor sy bors. Hulle het dadelik ’n elektrokardiogram (EKG) op hom gedoen, maar hulle kon niks sien wat pla nie.”

Volgens haar het hy ná die kliniekbesoek soos gewoonlik huis toe gekom.

“Hy was heel oraait toe hy by die huis kom, maar ek het opgelet hy probeer my vermy – so asof hy geweet het as hy my sou vertel wat fout is, sal ek hom keer.”

Sy sê sy het laatmiddag na haar niggie Ronelda se dogter se matriekafskeidvieringe in Topkamp gegaan, soos hulle vooraf afgespreek het.

“Hy het vir my gesê ek moet alleen gaan, hy wil eerder by die huis wees. Ek het toe die kinders by hom gelos en is Topkamp toe.”

“Ons oudste seun, Joshua (14), het later by my aangesluit. Toe ek hom vra wat hy hier maak, het hy gesê sy pa het gesê hy moet na my toe kom. Ek het hom toe teruggestuur met iets om te eet vir sy pa sodat hy sy pille kan drink. Maar oomblikke later was Joshua weer by my en sê sy pa het gesê hy moet kom sodat ek nie alleen huis toe hoef te loop nie.”

Johnique sê sy het omstreeks 22:30 na haar foon gekyk en gesien daar is ’n “please call me”-boodskap van Johan af, asook twee gemiste oproepe van ’n onbekende nommer.

“Ek het ’n “please call me”-boodskap na Johan se foon toe gestuur en my buurvrou, Charleen, het teruggebel en gesê ek moet dadelik huis toe kom, want Johan lê op die stoep sonder om te beweeg. Ons het huis toe gehaas, maar toe ons daar kom, was hy reeds toegegooi. My hart het tot in my voete gesink.”

“Ek en die kinders gaan hom baie mis. Hy was ons alles. Hy was my eerste groot liefde, my vriend, my lewensmaat en steunpilaar. Hy het my die dinge van die lewe geleer. Hy het my met soveel deernis, respek en liefde behandel. Ek was net 18 toe ons getrou het. Hy het my die vrou gemaak wie ek vandag is. Ek is baie lief vir hom,” voeg sy by.

“Hy het altyd soggens eerste opgestaan en vir my koffie in die bed gebring. Voordat hy skool toe is, het hy my altyd herinner om 10:00 sy kos na die skool se draad toe te bring. Ek gaan hom vreeslik mis. Hy was die enigste een wat my altyd op my doopnaam genoem het, en hy het dit so mooi uitgespreek.”

Johan laat sy vrou en vier kinders, Gillbert Willemse (23) uit ’n vorige verhouding, Zainu-Nisha (16), Joshua (14) en Riley (6), agter.

Die begrafnis van wyle Johan “Hannie-Boy” Januarie sal op Saterdag 22 Augustus by die Evangeliese Lutherse Kerk plaasvind.

09/08/2026

🟢 𝐃𝐈𝐄𝐒𝐄𝐋 𝐒𝐓𝐎𝐑𝐓 𝐍𝐀́ 𝐎𝐍𝐆𝐄𝐋𝐔𝐊 𝐎𝐏 𝐍𝟏 𝐁𝐔𝐈𝐓𝐄 𝐓𝐎𝐔𝐖𝐒𝐑𝐈𝐕𝐈𝐄𝐑

Diesel het Sondagmiddag 9 Augustus op die N1 by Hoogland, buite Touwsrivier, gestort nadat ’n vragmotor se sleepwa tydens ’n ongeluk losgekom en langs die pad omgeslaan het.

Die ongeluk het omstreeks 12:30 plaasgevind. Geen beserings is aangemeld nie.

Motoriste word egter gemaan om die gebied met omsigtigheid te nader, aangesien diesel op die padoppervlak beland het.

04/08/2026

🟢 𝐕𝐚𝐧 𝐓𝐨𝐮𝐰𝐬𝐫𝐢𝐯𝐢𝐞𝐫 𝐭𝐨𝐭 𝐝𝐢𝐞 𝐌𝐢𝐝𝐝𝐞-𝐎𝐨𝐬𝐭𝐞: 𝐍𝐚𝐭𝐡𝐚𝐧 𝐌𝐜𝐓𝐡𝐨𝐦𝐚𝐬 𝐯𝐞𝐫𝐭𝐞𝐥 𝐯𝐚𝐧 𝐬𝐲 𝐥𝐞𝐰𝐞 𝐨𝐨𝐫𝐬𝐞𝐞 𝐞𝐧 𝐡𝐨𝐞 𝐡𝐲 𝐠𝐞𝐥𝐞𝐞𝐧𝐭𝐡𝐞𝐝𝐞 𝐚𝐚𝐧𝐠𝐞𝐠𝐫𝐲𝐩 𝐡𝐞𝐭.

𝑇𝑜𝑒 𝑁𝑎𝑡ℎ𝑎𝑛 𝑀𝑐𝑇ℎ𝑜𝑚𝑎𝑠 𝑜𝑝 𝑇𝑜𝑢𝑤𝑠𝑟𝑖𝑣𝑖𝑒𝑟 𝑔𝑟𝑜𝑜𝑡𝑔𝑒𝑤𝑜𝑟𝑑 ℎ𝑒𝑡, 𝑠𝑜𝑢 ℎ𝑦 𝑛𝑜𝑜𝑖𝑡 𝑘𝑜𝑛 𝑑𝑖𝑛𝑘 𝑑𝑎𝑡 ℎ𝑦 𝑒𝑒𝑛𝑑𝑎𝑔 𝑖𝑛 𝑑𝑖𝑒 𝑀𝑖𝑑𝑑𝑒-𝑂𝑜𝑠𝑡𝑒 𝑠𝑜𝑢 𝑤𝑜𝑜𝑛 𝑒𝑛 𝑤𝑒𝑟𝑘 𝑛𝑖𝑒. 𝑉𝑎𝑛𝑑𝑎𝑔 𝑛𝑜𝑒𝑚 𝑑𝑖𝑒́ 𝑇𝑜𝑢𝑤𝑠𝑟𝑖𝑣𝑖𝑒𝑟𝑑𝑒𝑟 𝑀𝑢𝑠𝑐𝑎𝑡 𝑖𝑛 𝑂𝑚𝑎𝑛 𝑠𝑦 𝑡𝑢𝑖𝑠𝑡𝑒 𝑒𝑛 ℎ𝑒𝑡 ℎ𝑦 𝑟𝑒𝑒𝑑𝑠 𝑑𝑖𝑒 𝑔𝑒𝑙𝑒𝑒𝑛𝑡ℎ𝑒𝑖𝑑 𝑔𝑒ℎ𝑎𝑑 𝑜𝑚 𝑜𝑜𝑘 𝑖𝑛 𝐶ℎ𝑖𝑛𝑎 𝑡𝑒 𝑤𝑜𝑜𝑛 𝑒𝑛 𝑤𝑒𝑟𝑘.

𝑇𝑦𝑑𝑒𝑛𝑠 '𝑛 𝑜𝑛𝑙𝑎𝑛𝑔𝑠𝑒 𝑣𝑎𝑘𝑎𝑛𝑠𝑖𝑒 𝑡𝑒𝑟𝑢𝑔 𝑏𝑦 𝑑𝑖𝑒 ℎ𝑢𝑖𝑠 ℎ𝑒𝑡 𝐓𝐨𝐮𝐰𝐬𝐍𝐮𝐮𝐬 𝑏𝑦 𝑁𝑎𝑡ℎ𝑎𝑛 𝑖𝑛𝑔𝑒𝑙𝑜𝑒𝑟 𝑜𝑚 𝑚𝑒𝑒𝑟 𝑡𝑒 ℎ𝑜𝑜𝑟 𝑜𝑜𝑟 𝑠𝑦 𝑟𝑒𝑖𝑠, 𝑠𝑦 𝑙𝑒𝑤𝑒 𝑖𝑛 𝑑𝑖𝑒 𝑏𝑢𝑖𝑡𝑒𝑙𝑎𝑛𝑑 𝑒𝑛 𝑑𝑖𝑒 𝑙𝑒𝑠𝑠𝑒 𝑤𝑎𝑡 ℎ𝑦 𝑙𝑎𝑛𝑔𝑠 𝑑𝑖𝑒 𝑝𝑎𝑑 𝑔𝑒𝑙𝑒𝑒𝑟 ℎ𝑒𝑡. 𝐻𝑦 𝑑𝑒𝑒𝑙 𝑜𝑜𝑘 𝑠𝑦 𝑏𝑜𝑜𝑑𝑠𝑘𝑎𝑝 𝑎𝑎𝑛 𝑗𝑜𝑛𝑔𝑚𝑒𝑛𝑠𝑒 𝑤𝑎𝑡 𝑑𝑎𝑎𝑟𝑣𝑎𝑛 𝑑𝑟𝑜𝑜𝑚 𝑜𝑚 𝑒𝑒𝑛𝑑𝑎𝑔 𝑑𝑖𝑒 𝑤𝑒̂𝑟𝑒𝑙𝑑 𝑡𝑒 𝑣𝑒𝑟𝑘𝑒𝑛 – 𝑎𝑙 𝑏𝑒𝑔𝑖𝑛 𝑑𝑎𝑎𝑟𝑑𝑖𝑒 𝑑𝑟𝑜𝑜𝑚 𝑖𝑛 '𝑛 𝑘𝑙𝑒𝑖𝑛 𝐾𝑎𝑟𝑜𝑜𝑑𝑜𝑟𝑝.

𝐕𝐞𝐫𝐭𝐞𝐥 𝐯𝐢𝐫 𝐨𝐧𝐬 𝐛𝐢𝐞𝐭𝐣𝐢𝐞 𝐯𝐚𝐧 𝐣𝐨𝐮𝐬𝐞𝐥𝐟. 𝐖𝐢𝐞 𝐢𝐬 𝐍𝐚𝐭𝐡𝐚𝐧 𝐌𝐜𝐓𝐡𝐨𝐦𝐚𝐬, 𝐞𝐧 𝐡𝐨𝐞 𝐡𝐞𝐭 𝐢𝐞𝐦𝐚𝐧𝐝 𝐯𝐚𝐧 𝐓𝐨𝐮𝐰𝐬𝐫𝐢𝐯𝐢𝐞𝐫 𝐮𝐢𝐭𝐞𝐢𝐧𝐝𝐞𝐥𝐢𝐤 𝐢𝐧 𝐎𝐦𝐚𝐧 𝐛𝐞𝐥𝐚𝐧𝐝?

Nathan McThomas is 'n normale plattelander, 'n seun van Touwsrivier wat in Westrand grootgeword het. Soos elke Touwsrivierder het ek verlief geraak op die kultuur van ons dorp, asook die sport. Om tydens hoërskool- en universiteitsvakansies saam met vriende op die wingerd te werk, was van die beste tye van my tienerjare. Dit was ook tussen die druiwe waar ons as vriende gesels het oor waar ons eendag in die lewe wil eindig.

Om oorsee te gaan werk, het ná my eerste pos by Hoërskool Elsiesrivier in 2016 'n droom begin word. Ek het begin aansoek doen vir poste oorsee en het in 2018 in Xi'an, China, begin werk. Ongelukkig moes ek aan die einde van 2019 terugkeer weens die COVID-19-pandemie. In 2025 het ek weer besluit om vir poste oorsee aansoek te doen en was ek suksesvol met 'n werksgeleentheid in Muscat, Oman, in die Midde-Ooste.

𝐇𝐞𝐭 𝐣𝐲 𝐨𝐨𝐢𝐭, 𝐭𝐨𝐞 𝐣𝐲 𝐧𝐨𝐠 𝐨𝐩 𝐓𝐨𝐮𝐰𝐬 𝐰𝐚𝐬, 𝐠𝐞𝐝𝐢𝐧𝐤 𝐣𝐲 𝐠𝐚𝐚𝐧 𝐞𝐞𝐧𝐝𝐚𝐠 𝐢𝐧 𝐥𝐚𝐧𝐝𝐞 𝐬𝐨𝐨𝐬 𝐂𝐡𝐢𝐧𝐚 𝐞𝐧 𝐎𝐦𝐚𝐧 𝐰𝐨𝐨𝐧 𝐞𝐧 𝐰𝐞𝐫𝐤?

Nee. die plan was nooit om oorsee te werk nie. Maar as tiener op Touwsrivier het ek geweet van mense uit ons dorp wat oorsee gewerk het, soos Heinrich Arries (Oud-Touwsrivierder wat deesdae in Nieu-Seeland woon en werk) en Petrus Jefta ('n Touwsrivierder wat vir 'n tyd lank in Engeland krieket gespeel het). Ek het altyd ged**k dat dit dalk eendag ook ek kan wees.

𝐇𝐨𝐞 𝐡𝐞𝐭 𝐝𝐢𝐭 𝐠𝐞𝐯𝐨𝐞𝐥 𝐭𝐨𝐞 𝐣𝐲 𝐯𝐢𝐫 𝐝𝐢𝐞 𝐞𝐞𝐫𝐬𝐭𝐞 𝐤𝐞𝐞𝐫 𝐨𝐩 '𝐧 𝐯𝐥𝐢𝐞𝐠𝐭𝐮𝐢𝐠 𝐤𝐥𝐢𝐦 𝐨𝐦 𝐨𝐨𝐫𝐬𝐞𝐞 𝐭𝐞 𝐠𝐚𝐚𝐧? 𝐖𝐚𝐬 𝐣𝐲 𝐛𝐚𝐧𝐠 𝐨𝐟 𝐧𝐞𝐭 𝐨𝐩𝐠𝐞𝐰𝐨𝐧𝐝𝐞?

Dit is altyd moeilik om die huis te verlaat, want jy los familie en vriende agter en verruil wat bekend is vir die onbekende. Maar dit is die opoffering wat 'n mens maak as jy jou familie in 'n beter posisie wil plaas. Ek was altyd opgewonde en net dankbaar vir die geleentheid.

𝐖𝐚𝐭 𝐰𝐚𝐬 𝐝𝐢𝐞 𝐯𝐫𝐞𝐞𝐦𝐝𝐬𝐭𝐞 𝐨𝐟 𝐢𝐧𝐭𝐞𝐫𝐞𝐬𝐬𝐚𝐧𝐭𝐬𝐭𝐞 𝐝𝐢𝐧𝐠 𝐰𝐚𝐭 𝐣𝐲 𝐢𝐧 𝐂𝐡𝐢𝐧𝐚 𝐞𝐧 𝐎𝐦𝐚𝐧 𝐠𝐞𝐬𝐢𝐞𝐧 𝐨𝐟 𝐛𝐞𝐥𝐞𝐞𝐟 𝐡𝐞𝐭?

Die vreemdste ding wat ek in China beleef het, is dat baie mense nie gewoond was daaraan om buitelanders te sien nie. Hulle het gereeld gevra om foto's saam met my te neem, omdat hulle nie gewoond was aan mense wat anders as hulle lyk nie.

In Oman is daar weer baie Suid-Afrikaners en die leefstyl is baie soortgelyk aan dié van Suid-Afrika. Dit was nogal vreemd toe ek 'n Spar-winkel in Muscat raakloop wat presies soos die Spars in Suid-Afrika lyk.

𝐖𝐚𝐭 𝐝𝐨𝐞𝐧 𝐣𝐲 𝐯𝐚𝐧𝐝𝐚𝐠 𝐢𝐧 𝐎𝐦𝐚𝐧, 𝐞𝐧 𝐰𝐚𝐚𝐫𝐯𝐚𝐧 𝐡𝐨𝐮 𝐣𝐲 𝐝𝐢𝐞 𝐦𝐞𝐞𝐬𝐭𝐞 𝐯𝐚𝐧 𝐣𝐨𝐮 𝐰𝐞𝐫𝐤 𝐞𝐧 𝐥𝐞𝐰𝐞 𝐝𝐚𝐚𝐫?

Ek is tans 'n hoërskoolonderwyser in Muscat en bied die vak Humanities aan, wat basies 'n mengsel van Geografie, Besigheidstudies en Geskiedenis is.

Ek geniet die feit dat respek een van die grootste waardes is waarna die leerders streef. Daar is nie 'n dag wat ek by die klas instap sonder dat die seuns my met 'n handdruk groet nie. Ek geniet ook die manier waarop die studente nie sommer alles aanvaar nie, maar sekere aspekte bevraagteken. Dit hou my op my tone en motiveer my om my werk altyd deeglik te beplan.

𝐖𝐚𝐭 𝐦𝐢𝐬 𝐣𝐲 𝐝𝐢𝐞 𝐦𝐞𝐞𝐬𝐭𝐞 𝐯𝐚𝐧 𝐓𝐨𝐮𝐰𝐬𝐫𝐢𝐯𝐢𝐞𝐫 𝐰𝐚𝐧𝐧𝐞𝐞𝐫 𝐣𝐲 𝐬𝐨 𝐯𝐞𝐫 𝐯𝐚𝐧 𝐝𝐢𝐞 𝐡𝐮𝐢𝐬 𝐚𝐟 𝐢𝐬?

Natuurlik mis 'n mens jou ma, broer, familie, meisie en vriende. Maar die ding wat ek die meeste van Touwsrivier mis, is die mense – om net rond te loop, bekendes raak te loop en met hulle te gesels. Ek mis ook die natuur en die berge. Ek d**k ons het van die mooiste uitsigte, veral wanneer die son sak.

𝐖𝐚𝐭 𝐢𝐬 𝐝𝐢𝐞 𝐠𝐫𝐨𝐨𝐭𝐬𝐭𝐞 𝐥𝐞𝐬 𝐰𝐚𝐭 𝐣𝐲 𝐠𝐞𝐥𝐞𝐞𝐫 𝐡𝐞𝐭 𝐝𝐞𝐮𝐫 𝐢𝐧 𝐚𝐧𝐝𝐞𝐫 𝐥𝐚𝐧𝐝𝐞 𝐭𝐞 𝐰𝐨𝐨𝐧 𝐞𝐧 𝐦𝐞𝐭 𝐦𝐞𝐧𝐬𝐞 𝐯𝐚𝐧 𝐯𝐞𝐫𝐬𝐤𝐢𝐥𝐥𝐞𝐧𝐝𝐞 𝐤𝐮𝐥𝐭𝐮𝐫𝐞 𝐬𝐚𝐚𝐦 𝐭𝐞 𝐥𝐞𝐞𝐟?

Ongeag jou godsdienstige of kulturele agtergrond en waarin jy glo, moet 'n mens altyd ander respekteer. Elke student, ongeag sy of haar geloof of kultuur, verdien 'n regverdige kans. Sodra jy as onderwyser voor 'n klas staan, is dit jou verantwoordelikheid om die beste diens aan elke student te lewer.

𝐖𝐚𝐬 𝐝𝐢𝐭 𝐚𝐥𝐭𝐲𝐝 𝐦𝐚𝐤𝐥𝐢𝐤, 𝐨𝐟 𝐰𝐚𝐬 𝐝𝐚𝐚𝐫 𝐝𝐚𝐞 𝐰𝐚𝐭 𝐣𝐲 𝐠𝐞𝐰𝐞𝐧𝐬 𝐡𝐞𝐭 𝐣𝐲 𝐢𝐬 𝐰𝐞𝐞𝐫 𝐛𝐲 𝐝𝐢𝐞 𝐡𝐮𝐢𝐬? 𝐇𝐨𝐞 𝐡𝐞𝐭 𝐣𝐲 𝐝𝐞𝐮𝐫 𝐝𝐚𝐚𝐫𝐝𝐢𝐞 𝐭𝐲𝐞 𝐠𝐞𝐤𝐨𝐦?

Dit is nie altyd maklik om so ver van die huis af te wees nie, veral met die verskillende tydsones en die afstand van jou geliefdes.

Gelukkig is daar baie ander buitelanders in Muscat. Ek hou myself besig met bergstap, sosiale sokker en krieket. Ek het ook aan die Muscat 21 km-halwe marathon deelgeneem. Verder ondersteun ek die plaaslike rugbyspan in Muscat. Dit is natuurlik nie dieselfde as om langs die veld op Touwpark te staan nie, maar dit laat my tog 'n bietjie soos by die huis voel.

𝐀𝐬 '𝐧 𝐣𝐨𝐧𝐠 𝐩𝐞𝐫𝐬𝐨𝐨𝐧 𝐯𝐚𝐧 𝐓𝐨𝐮𝐰𝐬𝐫𝐢𝐯𝐢𝐞𝐫 𝐝𝐫𝐨𝐨𝐦 𝐨𝐦 𝐞𝐞𝐧𝐝𝐚𝐠 𝐝𝐢𝐞 𝐰𝐞̂𝐫𝐞𝐥𝐝 𝐭𝐞 𝐬𝐢𝐞𝐧, 𝐰𝐚𝐭 𝐬𝐚𝐥 𝐣𝐲 𝐯𝐢𝐫 𝐡𝐨𝐦 𝐨𝐟 𝐡𝐚𝐚𝐫 𝐬𝐞̂?

As jy nie waag nie, sal jy nooit weet nie.

𝐖𝐚𝐭 𝐢𝐬 𝐣𝐨𝐮 𝐠𝐫𝐨𝐨𝐭𝐬𝐭𝐞 𝐝𝐫𝐨𝐨𝐦 𝐯𝐢𝐫 𝐝𝐢𝐞 𝐭𝐨𝐞𝐤𝐨𝐦𝐬, 𝐞𝐧 𝐰𝐚𝐭𝐭𝐞𝐫 𝐛𝐨𝐨𝐝𝐬𝐤𝐚𝐩 𝐰𝐢𝐥 𝐣𝐲 𝐯𝐢𝐫 𝐝𝐢𝐞 𝐣𝐨𝐧𝐠𝐦𝐞𝐧𝐬𝐞 𝐯𝐚𝐧 𝐓𝐨𝐮𝐰𝐬𝐫𝐢𝐯𝐢𝐞𝐫 𝐥𝐨𝐬 𝐰𝐚𝐭 𝐝𝐚𝐥𝐤 𝐯𝐨𝐞𝐥 𝐡𝐮𝐥𝐥𝐞 𝐝𝐫𝐨𝐦𝐞 𝐢𝐬 𝐭𝐞 𝐠𝐫𝐨𝐨𝐭 𝐯𝐢𝐫 '𝐧 𝐤𝐥𝐞𝐢𝐧 𝐝𝐨𝐫𝐩?

Ek het eendag 'n aanhaling van een van my gunstelingmusikante, Tupac Shakur, gelees wat sê:

"I'm not saying I'm gonna change the world, but I guarantee that I will spark the brain that will change the world."

Dit is ook my onderwysfilosofie en my grootste droom: om studente te inspireer om suksesvol te wees en 'n verskil in hul eie lewens te maak.

Ek d**k jongmense twyfel soms 'n bietjie in hulself en het net motivering en inspirasie nodig. "Yster slyp yster", daarom is dit belangrik om jouself te omring met mense wat dieselfde waardes en doelwitte het en jou drome ondersteun.

Moet nooit aan jouself twyfel nie. Vertrou op die Here en werk hard.

28/07/2026

🟢 𝐃𝐢𝐞 𝐃𝐞 𝐊𝐫𝐮𝐢𝐧𝐞 𝐒𝐤𝐨𝐨𝐥𝐤𝐨𝐨𝐫 (𝟐𝟎𝟎𝟐–𝟐𝟎𝟎𝟖) 𝐛𝐞𝐠𝐢𝐧 𝐡𝐢𝐞𝐫𝐝𝐢𝐞 𝐧𝐚𝐰𝐞𝐞𝐤 𝐨𝐞𝐟𝐞𝐧 𝐯𝐢𝐫 𝐡𝐮𝐥 𝐠𝐫𝐨𝐨𝐭 𝐫𝐞𝐮̈𝐧𝐢𝐞-𝐬𝐚𝐧𝐠𝐚𝐚𝐧𝐝 𝐨𝐩 𝟐𝟔 𝐒𝐞𝐩𝐭𝐞𝐦𝐛𝐞𝐫!

Terwyl die oudkoorlede weer hul stemme warm maak, kyk ons terug na een van hul hoogtepunte – hul optrede tydens die Venus-fees in 2004, wat regstreeks op Morning Live op SABC2 uitgesaai is.

💬 𝐃𝐞𝐞𝐥 𝐣𝐨𝐮 𝐡𝐞𝐫𝐢𝐧𝐧𝐞𝐫𝐢𝐧𝐠𝐞 𝐦𝐞𝐭 𝐨𝐧𝐬 𝐢𝐧 𝐝𝐢𝐞 𝐤𝐨𝐦𝐦𝐞𝐧𝐭𝐚𝐚𝐫:
1️⃣ Wat was jou gunsteling lied wat die koor gesing het?
2️⃣ Watter liedere hoop jy om weer op 26 September te hoor?

🎟️ 𝐊𝐚𝐚𝐫𝐭𝐣𝐢𝐞𝐬 𝐤𝐨𝐬 𝐑𝟑𝟎 en is by die oudkoorlede beskikbaar.

Ons sien uit daarna om saam met julle hierdie besondere geleentheid te vier!

🎥 Morning Live/SABC

TouwsNuus

06/09/2026

04/09/2026

02/09/2026

01/09/2026

23/08/2026

13/08/2026

12/08/2026

09/08/2026

04/08/2026

28/07/2026

Address

Opening Hours

Telephone

Website

Alerts

Contact The Business

Shortcuts

Share

Category

Listing takedown request

Monday	08:30 - 04:30
Tuesday	08:30 - 16:30
Wednesday	08:30 - 16:30
Thursday	08:30 - 16:30
Friday	08:30 - 16:30