16/04/2026
READ | Official Statement sang apat ka mga konsehal sang La Carlota City nga nagwalk-out samtang naga-padayon ang regular session sadtong Miyerkules, Abril 15.
-
Ginapahayag namon ini agud mabutang sa opisyal nga rekord ang mga kahimtangan nga nag resulta sa amon kolektibo nga pag-walkout sa sesyon sang Sangguniang Panlungsod subong nga adlaw.
Ang amo nga tikang ginbunga sang aksyon sang Presiding Officer, Vice Mayor David Baga, sa pag-obserbar sang mga ginpatuman nga pamaagi sang parliamentary courtesy kag insakto nga pamatasan. Bilang mga miyembro sang minoriya, kami may yara sang kinamatarong nga kilalahon kag pamatian sa tanan nga deliberasyon sang lehislatura.
Ang ini nga kinamatarong naga base sa mga prinsipyo sang due process kag maathag nga pang gobyerno.
Ginapamatud-an namon nga wala sang gin bali nga layi ang amon desisyon kag ginakabig namon nga indi matuod ang ginapalapta sa social media nga kami ang nag monopolyo sang nagligad nga sesyon. Ang aktibo nga partisipasyon sa deliberasyon yara sa desisyon sang tagsa ka miyembro, kag indi mahimo nga ipasa sa amon ang kakulangan sang pagpartisipar sang iban namon nga kaupod sa konseho.
Ginakondenar man namon ang paggamit sang indi angay, makalain sang buot, kag indi propesyunal nga mga tinaga nga ginpahayag parte sa isa ka miyembro sang konseho, labi na gid ang hambalanon nga βgina into mo lang ang mga tawo,β nga ginhambal sa kay Councilor Mark Threx Rojo. Sa tion nga ginpahayag ini, kami nagpaabot na sang amon intensyon nga magbalik sa point of order, apang nagpadayon gihapon ang Presiding Officer sa paghambal sang mga pahayag nga indi angay kag makaguba sang reputasyon.
Bisan pa nga kami padayon nga nagarespeto sa mga layi sang pamaagi kag ginatipigan ang dignidad sang Sangguniang Office , indi namon mabaton ang bisan ano nga tikang nga nagapakalain, nagapakanubo, ukon nagahatag malain nga imahe sa amon bilang mga ginpili nga opisyal, labi na gid kon ini ginahimo sa publiko nga lugar kag ginapalapta paagi sa social media.
Bangod sini, ginapangayo namon nga ang Presiding Officer kag ang tanan nga miyembro magtuman gid sa mga lagda sang parliamentary procedure kag maghatag sang husto nga pagrespeto, hustisya, kag patas nga pagtratar sa tanan nga miyembro sang Sanggunian, bisan ano pa ang ila politikal nga panindugan.
Ang amon pag-walkout indi dapat i kabig bilang pagpamalabag ukon pagdisturbo sang sesyon. Kundi, ini isa ka panindugan kag kinahanglan nga tikang agud maprotektahan ang integridad sang institusyon kag mapatuman ang amon mga kinamatarong, dignidad, kag mandato nga ginhatag sa amon sang amon mga konstituyente.
AMO INI ANG AMON PAHAYAG.
