17/09/2025
Kapitan Evangelista, Mipaklaro sa Isyu sa Giingong “Ghost Project” sa Brgy. Linabo
Barangay Captain Manuel Evangelista mipasabot sa DXDB Radyo Bandilyo kalabot sa giingong “ghost project” nga nagkantidad og ₱96.5 milyon sa ilang Barangay Linabo, Malaybalay City, Bukidnon.
Matod pa sa Kapitan, nagkamalinaw lang ang impormasyon sa Taga-PACC (Presidential Anti-Corruption Commission) atol sa ilang interview kaniadtong bag-ohay lang. Ang ilang gipangita nga proyekto mao man diay ang flood control project sa Purok 8. Iyang unang tubag nga wala siya kabalo kay wala gyud kini makita sa lugar.
Apan, human niya masusi sa DPWH karong buntaga, naklaro nga ang miaging Barangay Council nagpagawas og resolusyon nga naghangyo nga ibalhin ang maong proyekto gikan sa Purok 8 ngadto sa tunga sa Purok 3 ug 4. Ang hinungdan, kay ang mga residente ug tag-iya sa yuta sa Purok 8 wala motugot nga tukoran ang flood control kay dako kuno ang matapyas sa ilang yuta.
Midugang si Kapitan Evangelista nga nagsabot na sila sa PACC nga ilang kuhaon ang klarong kasayuran gikan sa DPWH aron mahibal-an nganong wala madayon ug nganong wala makita ang proyekto sa Purok 8.
Sa pagbisita sa DXDB Radyo Bandilyo sa lugar, nasuta nga adunay flood control nga natukod duol sa Concrete & Steel Bridge sa Sawaga River, Linabo, Malaybalay City.
Via Bandilyo Boy Demet
