12/05/2025
Day 13: အာဝင်တူး ဒုတိယအပတ် သောကြာနေ့
“ကျိုးပဲ့သွားသော သံယောဇဥ် များ အား ကုသခြင်း”
by Fr. Paul Lin Htut
ငြိမ်းချမ်းခြင်း နှင့် စပ်လျဥ်း ပြီး စဥ်းစားနေချိန် အတွေးလေး တစ်ခု ဝင်လာသည်မှာ - သံယောဇဥ်တွေ ကျိုးပဲ့လို့ နေလျင် ဘယ်တော့ များ စိတ်နှလုံး က ငြိမ်သက်တော့မှာလဲပေါ့ ။ ကမ္ဘာဦးကျမ်း မှ ၄ ဦး သော ပုဂ္ဂိုလ် တွေကို ပြန်လည် သတိရမိပါတယ် - ဖန်ဆင်းရှင် ထာဝရဘုရားသခင်ရယ်၊ အာဒံ နှင့် မဧဝ ရယ်၊ ဂျိုထောင်ထောင်နှင့် ကိုမြွေဆိုးရယ် ပေါ့။ ညီအစ်ကို မောင်နှမတို့ သိပြီးပြီးသားဟု ယူဆ ၍ အဖြစ်အပျက် လေးကို အလုံးစုံတော့ ပြန်လည် မပြော တော့ပါဘူး။ (ကမ္ဘာဦးကျမ်း အခန်းကြီး ၃)
သို့ရာ တွင် ဂျိုထောင်ထောင်နှင့် ကိုမြွေဆိုး(ဆာတန်)၏ လုပ်ရပ်ကြောင့် လူသားသည် ပညတ်ချက်ကို ချိုးဖောက်ကာ၊ လူနှင့် ဘုရား အကြား သံယောဇဥ်များ ကျိုးပဲ့ခဲ့ရ ပြီး၊ အကျိုးဆက်အနေဖြင့် ‘သေခြင်း’ကို ပွေးပိုက်ရပြီး၊ ဧဒင်ဥယျာဥ် မှ ထွက်ခွာခဲ့ရပါတယ်။ ထိုအချိန်မှ အစပြု ပြီး သံယောဇဥ်များ ကနဦးအတိုင်း ဖြစ်စေရန် ကယ်တင်ခြင်း သမိုင်းတလျောက် ကြိုးစားလာခဲ့တာ ကို တွေ့ရမှာဖြစ်ပါတယ်။ ထိုသို့ ကြိုးစားလာခဲ့ရာ နောက်ဆုံးတွင် ဘုရား၏ သားတော် ကိုယ်တိုင် လာရောက်ကာ ပူဇော်ရာယစ်ကောင်အဖြစ် နှင့် အပြစ်များ ဖြေလွတ် ပြန်လည် သင့်မြတ် စေခဲ့ပါတယ်။
ထို့ကြောင့် ဘုရားသား သခင်ခရစ်တော် မွေးဖွားလာမည့် ကို စောင့်မျော်နေသော ဤအာဝင်တူးအချိန်ကာ လ သည် ပြန်လည် သင့်မြတ် ရန် နှင့် အချင်းချင်း ခွင့်လွတ်ကြရန်၊ ကျိုးပဲ့သွားသော သံယောဇဥ် တို့အား ကုစားရန် အချိန်ဖြစ်ပေသည်။ လက်ရှိ ကမ္ဘာမြေ အခြေအနေအား လေ့လာကြည့် ကြည့်ပါက ကုစားရန် အထူးအထူး လိုအပ်နေကြောင့် သင်ရော ကျွန်ုပ်ပါ အသိပင် ဖြစ်ပေလိမ့်မည်။ ဒါဟာ ဘုရားသခင် ၏ အလိုတော်လဲ ဖြစ်ပေသည်။
“ဘုရားသခင်သည် ခရစ်တော် အထဲ၌ ရှိနေလျက်၊ လောကီသားတို့၏ အပြစ်များကို မှတ်တော်မမူ၊ ရန်ကို ငြိမ်းစေ၍ ကိုယ်တော်နှင့် မိဿဟာယဖွဲ့စေတော်မူ၏။ ထိုမိဿဟာယတရားကို ငါတို့အား ဆက်လက် ပြုကျင့်ရန် အပ်ထားတော်မူ၏” ၂ ကောရိန် ၅း၁၉
အမှန်တကယ်မှာ ပြန်လည် ကျေးအေးသင့်မြတ် ရန်၊ ဆက်ဆံရေးတို့ကို ကုသ၊ ကုစားရန်မှာ လုံးဝမလွယ်ကူပေ။ နှိမ့်ချခြင်း၊ ရိုးသားခြင်း၊ ခွင့်လွတ်ခြင်းနှင့် သတ္တိ တို့ လိုအပ်ပါတယ်။ ထို့အပြင် - မိမိတို့၏ မာန တို့ အား ခဝါချပြီး၊ ရှက်ကြောက်မှု တို့ အား ကျော်လွန် အောင်နိုင် ရမှာလဲ ဖြစ်နေပါတယ်။ ဆက်ဆံရေးကြောင့် ဖြစ်သော နာကျင်မှု ဒဏ်ရာတွေ ဟာ အသစ်လဲဖြစ်နေနိုင်သလို၊ အဟောင်းတွေလဲ ဖြစ်နေတက်ပါတယ်။ ဝေးဝေး နေရင် ပြီးသွားရောလို့ ထင်မှတ် ထားတက်သော်လည်း ဒါဟာ အမြစ်ပြတ်မဲ့ နည်းလည်း ဘယ်တော့မှ မဟုတ်ပါ။ ထာဝရ ဘုရား သခင် ၏ နည်းလမ်းဟာ အရှင်းဆုံး ဖြစ်ပါတယ် -
“သင်တို့သည် လူအပေါင်းတို့နှင့် အသင့်တင့် နေကြလော့။ … အဆိုးအားဖြင့် အရှုံးမခံနှင့် အကောင်းအား ဖြင့် အဆိုး ကို နိုင်လော့။” ရောမ ၁၂း၁၈-၂၁
ထပ်မံ ဖြည့်စွပ်ရမည်ဆိုလျင် - ကျိုးပဲ့နေသော သံယောဇဥ်တို့သည် သင့်၏ ဝိညာဥ် ၏ အားအင်ကို ချိနဲ့စေသည်။ သင့်၏ ငြိမ်းချမ်းခြင်းကို ခိုးယူသွားသည်။ ကျေးဇူးတော်လာရာ လမ်းကို ပိတ်ဆို့စေသည်။ ခွင့်မလွတ် ရန် ဆုံးဖြတ်ထားသည့် အခါ တွင် မိမိ ကိုယ်ကို အကျဥ်းချထားခြင်းနှင့် တူပါသည်။ ခွင့်မလွတ်ခြင်း များ လာလေလေ နယ်မြေများ ကျဥ်းသထက် ကျဥ်းလာလေလေဖြစ်တက်ပါသည်။ သည့်ထက် အရေးကြီးသည်မှာ အဖဘုရားထံ မှ ခွင့်လွတ်ခြင်း နှင့် ဝေးနေပေလိမ့်မည်။ ထို့ကြောင့် ပျော့ပြောင်းသော နှလုံးသားများ တွက် ဆုတောင်းပါ။
“သင်တို့သည် သူတပါးတို့၏ အပြစ်ကို မလွတ်လျင်၊ သင်တို့အဘသည် သင်တို့၏ အပြစ်ကို လွတ်တော်မမူ။” ရှင်မာတေဦး ၆း၁၄
ကျမ်းစာ
“စိတ်နှလုံးနှိမ့်ချသော သူတို့သည် မင်္ဂလာရှိကြ၏။ အကြောင်းမူကား ကောင်းကင်နိုင်ငံတော်သည် ထိုသူတို့၏ နိုင်ငံဖြစ်၏။ စိတ်မသာညည်းတွားသော သူတို့သည် မင်္ဂလာရှိကြ၏။ အကြောင်းမူကား ထိုသူတို့သည် သက်သာခြင်း သို့ရောက်ကြလတံ့။ စိတ်နူးညံ့သိမ်မွေ့သော သူတို့သည် မင်္ဂလာရှိကြ၏။ အကြောင်းမူကား, ထိုသူတို့သည် ပြည်တော်ကို အမွေခံ ရကြလတံ့။ ဖြောင့်မတ်ခြင်းပါရမီကို ဆာငတ်ခင်မွတ်သော သူတို့သည် မင်္ဂလာရှိကြ၏. အကြောင်းမူကား ထိုသူတို့သည် ဝပြောခြင်းသို့ရောက်ကြလတံ့။ သနားစုံမတ်တတ်သော သူတို့သည် မင်္ဂလာရှီကြ၏ အကြောင်းမူကား၊ ထိုသူတို့သည် သနားစုံမက်ခြင်း ကို ခံရကြလတံ့။ စိတ်နှလုံး ဖြူစင်သော သူတို့သည် မင်္ဂလာရှိကြ၏။ အကြောင်းမူကား၊ ထိုသူတို့သည် ဘုရားသခင်ကို မြင်ရကြလတံ့။ သူတပါးချင်းခိုက်ရန် ပြုခြင်းကို ငြိမ်းစေသော သူတို့သည် မင်္ဂလာရှိကြ၏။ အကြောင်းမူကား ထိုသူတို့သည် ဘုရားသခင်၏ သားတော် ဟု ခေါ်ဝေါ်ခြင်းကို ခံရကြလတံ့။ ဖြောင့်မတ်ခြင်းတရားကြောင့် နှောင့်ယှက်ညှဥ်း ဆဲခြင်းကို ခံရသော သူတို့သည် မင်္ဂလာရှိကြ၏ အကြောင်းမူကား ၊ ကောင်းကင်နိုင်ငံတော်သည် ထိုသူတို့၏ နိုင်ငံ ဖြစ်၏။ ငါ့ကြောင့် သင်တို့ကို ကဲ့ရဲ့ ညှဥ်းဆဲ၍ မမျန်ဘဲလျက် အပြစ်တကာ တင်ကြသော အခါ၊ သင်တို့သည် မင်္ဂလာရှိကြ၏ ဝမ်းမြောက်ရွင်မြူးခြင်းရှိကြလော့။ အကြောင်းမူကား၊ ကောင်းကင် ဘုံ၌ သင်တို့၏ အကျိုးသည် ကြီးလှပေ၏” ရှင်မာတေဦး ၅း၃-၁၂
ယနေ့သင့်၏ အသက်တာတွင်
ပြန်လည်သင့်မြတ်ရန် လိုသော သူများ အား ပြန်လည် ရေတွက်ပါ။
သင်နှင့် သင်မြတ်ရန် လိုအပ်သော သူများအား အမည်နာမတပ်၍ ဆုတောင်းပေးပါ.
ခွင့်မလွတ်နိုင်သော အကြောင့်အရင်းများအား ခရစ်တော်အား ပေလိုက်ပါ။
မိမိကိုယ်ကို ခရစ်တော်၌ တို့ထိ ၍ ကုသခံပါ။
ဆုတောင်းမေတ္တာစာ
ကိုယ်တော်ရှင်သည် တပည့်တော်တို့ သယ်ဆောင်ထားသော ဒဏ်ရာများ၊ နှလုံးသားအတွင်းရှိ အမုန်းများ အား အသိဆုံးဖြစ်ပါသည်။ ကိုယ်တော် ကုသပေးရန် လိုအပ်ပါသည်။ တပည့်တော် ကိုယ်တိုင် သည် လည်း ကုသခံ ရန် အလိုရှိနေပါသည်။ ကုသပေးတော်မူပါ။ ကိုယ်တော် ရှင်၌ ယုံကြည် အပ်နှံ ပါသည်။ အာမင်
Fr. Paul Lin Htut
