09/20/2026
រឿង «តាំង មុយលាង» កំពុងល្បី! រដ្ឋបាលខណ្ឌទួលគោក ចេញបំភ្លឺ និងត្រៀមចុះអប់រំជាថ្មី
រដ្ឋបាលខណ្ឌទួលគោក បានចេញសេចក្តីប្រកាសព័ត៌មាន ស្តីពីករណីម្ចាស់ផ្ទះឈ្មោះ តាំង មុយលាង (ទីក្រុងសោ) នៅតាមបណ្តោយផ្លូវម៉ៅសេទុង សង្កាត់ផ្សារដេប៉ូទី១ ខណ្ឌទួលគោក ដែលកំពុងទទួលបានការចាប់អារម្មណ៍នៅលើបណ្ដាញសង្គម។
តាមសេចក្តីប្រកាសព័ត៌មាន រដ្ឋបាលខណ្ឌបានឱ្យដឹងថា ករណីនេះពាក់ព័ន្ធនឹងការចោទប្រកាន់ថា ម្ចាស់ផ្ទះបានយកចិញ្ចើមផ្លូវសាធារណៈធ្វើជាកម្មសិទ្ធិ និងមិនអនុញ្ញាតឱ្យប្រជាពលរដ្ឋចតយានយន្តនៅលើចិញ្ចើមផ្លូវ ព្រមទាំងមានការជេរប្រមាថប្រជាពលរដ្ឋ។
ក្រោយទទួលបានព័ត៌មាន លោក ជា ពិសី អភិបាលខណ្ឌទួលគោក បានដឹកនាំបញ្ជា និងប្រគល់ភារកិច្ចដល់លោក ស៊ឹម សុផង់ អភិបាលរងខណ្ឌ ឱ្យដឹកនាំកម្លាំងគណៈបញ្ជាការឯកភាពរដ្ឋបាលខណ្ឌ ចុះទៅកាន់ទីតាំង ដើម្បីធ្វើកំណត់ហេតុ អប់រំ និងណែនាំឱ្យបញ្ឈប់សកម្មភាពដែលមិនសមរម្យ ព្រមទាំងសុំទោសជាសាធារណៈ។
យ៉ាងណា នៅពេលកម្លាំងអាជ្ញាធរចុះទៅដល់ទីតាំង ម្ចាស់ផ្ទះបានបិទទ្វារ និងមិនស្ថិតនៅទីតាំងនោះឡើយ។
រដ្ឋបាលខណ្ឌទួលគោកបានបញ្ជាក់ថា គណៈបញ្ជាការឯកភាពខណ្ឌ នឹងចុះទៅកាន់ទីតាំងជាថ្មី នៅព្រឹកស្អែក វេលាម៉ោង ៩:០០នាទី ដើម្បីធ្វើកំណត់ហេតុ អប់រំ និងណែនាំឱ្យបញ្ឈប់សកម្មភាពពាក់ព័ន្ធ ព្រមទាំងសុំទោសជាសាធារណៈ។
ជាមួយគ្នានេះ រដ្ឋបាលខណ្ឌទួលគោក បានស្នើសុំឱ្យម្ចាស់ទីតាំងអាជីវកម្មខាងលើ ចូលរួមសហការជាមួយអាជ្ញាធរ ដើម្បីដោះស្រាយបញ្ហាឱ្យបានសមស្រប និងជូនដំណឹងដល់សាធារណជនឱ្យបានជ្រាបជាព័ត៌មាន៕
