https://www.facebook.com/profile.php?id=61584964076267

Cavite News Network, Indang Cavite, Indang (2026)

21/05/2026

HABOL SA TAG-INIT... TARA NA SA VILLA EXCELLANCE SA TANZA CAVITE

Kung sawa ka na sa sobrang init sa bahay at gusto mo ng quick escape kasama ang pamilya o barkada, swak na swak puntahan ang Villa Excellance Beach And Wave Pool Resort sa Brgy. Sahud-Ulan, Tanza, Cavite!

Trending ngayon ang resort dahil sa sobrang saya ng kanilang wave pool na parang legit na nasa beach ka habang humahampas ang alon.

Perfect ito para sa mga mahilig mag-swimming, mag-picture, at gumawa ng summer memories ngayong tag-init.

Bukod sa wave pool, marami ring ibang pools at water attractions na puwedeng enjoyin ng kids at adults.

Kaya kahit family outing, barkada trip, o simpleng chill getaway, panalo rito.

Marami ring cottages at rooms para sa gustong mag-overnight at mag-night swimming.

Marami ring netizens ang nagpo-post ng kanilang experience sa social media dahil sa ganda ng lugar at relaxing vibe nito.

Hindi rin nakakasawang mag-picture dahil Instagram-worthy ang maraming spots sa resort.

Ayon sa mga bumisita, sulit daw ang biyahe dahil bukod sa saya, presko rin ang ambiance at friendly pa ang staff.

Kaya naman tuwing weekends at holidays, dagsa talaga ang tao rito.

Kaya kung naghahanap ka ng “habol sa tag-init” moments bago matapos ang summer, isa ang Villa Excellance Beach And Wave Pool Resort sa mga dapat mong i-check sa Cavite.

Ready na ba ang swimwear at sunscreen mo?

21/05/2026

KOREAN GAME FARM, NILUSOB NG NBI

BUMAGSAK sa kamay ng mga awtoridad ang limang Korean national matapos salakayin ng mga operatiba ng National Bureau of Investigation (NBI) ang dalawang hinihinalang ilegal na online game farming operation sa Imus City, Cavite at Angeles City, Pampanga.

Ayon sa NBI-Special Action Unit (NBI-SAU), isinagawa ang magkahiwalay na operasyon bilang bahagi ng pinaigting na kampanya ng gobyerno laban sa online scamming at cybercrime activities.

Nabatid na ginagamit umano ng mga suspek ang online game na “Lineage Classic” para sa tinatawag na “game farming” kung saan nagpapalakas ng mga karakter at nag-iipon ng virtual currency na “Adena,” na umano’y ipinagpapalit sa totoong pera sa black market.

Sa isinagawang surveillance ng NBI, natunton ang operasyon ng mga dayuhan sa isang gusali sa Buhay na Tubig, Imus City.

Bitbit ang Warrant to Search, Seize, and Examine Computer Data (WSSECD), sinalakay ng mga ahente noong Mayo 8 ang ikalawa at ikatlong palapag ng gusali.

Nasamsam sa raid ang ilang computer units na aktibong nagpapatakbo ng online game. Nadiskubre rin ng mga awtoridad na gumagamit umano ang grupo ng messaging applications upang magbigay ng utos at updates sa kanilang operasyon.

Ayon sa mga Pilipinong empleyado na nadatnan sa lugar, umaabot umano sa 12 oras ang kanilang trabaho kada araw at iisa lamang ang pahinga kada linggo. Sinasabing binabayaran sila ng kanilang Korean supervisor.

Tatlong Korean national ang inaresto sa Imus operation at nahaharap sa kasong paglabag sa Anti-Financial Account Scamming Act at Social Security Act.

Samantala, noong Mayo 15, isa pang operasyon ang ikinasa ng NBI-SAU katuwang ang NBI-Tarlac District Office sa Angeles City, Pampanga.

Dalawa pang Korean national ang nadakip matapos madiskubre ang isa pang online game farming hub.

Nakumpiska rin doon ang maraming computer sets na ginagamit umano sa ilegal na operasyon. Kakaharapin ng dalawang dayuhan ang kasong paglabag sa Cybercrime Prevention Act at Anti-Financial Account Scamming Act.

Pinuri naman ni NBI Director Melvin A. Matibag ang matagumpay na operasyon ng mga ahente na nagresulta sa pagbuwag ng umano’y ilegal na online game farming activities sa bansa.

20/05/2026

FLOOD CONTROL O FLOOD DISASTER? RESIDENTE NG BACOOR, NAG-ALALA

BACOOR CITY, CAVITE — Isang concerned citizen mula sa Mabolo 3, Bacoor City ang nanawagan kay Department of Public Works and Highways (DPWH) Secretary kaugnay ng umano’y delikadong flood control project na maaaring magdulot ng matinding pagbaha at kapahamakan sa kanilang lugar ngayong tag-ulan.

Sa liham ni Rey Mabolo 3 ng Bacoor City, kanyang ipinahayag ang matinding pag-aalala matapos umanong gawing “material hauling point” ang natapos nang flood control project para sa pagpapatuloy ng konstruksyon.

Ayon kay Rey, bukas umano ang bahagi ng pader ng proyekto kaya nangangamba ang mga residente na magdulot ito ng mas malalang pagbaha sa kanilang komunidad.

“Ngayong rainy season, paano po maiiwasan ang pagbaha kung bukas ang flood control wall?” ani Rey sa kanyang liham.

Hindi lang pagbaha ang problema. Kinuwestiyon din niya ang disenyo ng retaining wall matapos mapansing “hollow” o walang solidong laman ang istruktura.

“Nasuri po ba nang maayos ang structural design nito? Sana hindi ito substandard,” dagdag pa niya.

Mas lalong ikinabahala ng residente ang umano’y paggamit ng maalat na tubig-ilog sa paghahalo ng semento habang ginagawa ang proyekto.

Babala niya, maaaring kalawangin agad ang bakal sa loob ng konkreto at humina ang pundasyon paglipas lamang ng ilang taon.

“Pag humina ang kapit ng bakal at konkreto, puwedeng bumigay ang buong proyekto,” pahayag niya.

Nagbabala rin si Rey sa posibleng “back pressure” ng tubig kapag may baha, na maaaring magtulak paatras sa retaining wall at magresulta sa pagbagsak nito.

Ayon pa sa kanya, kapag pinasok ng tubig ang hollow wall, maaaring lumambot o “magliquify” ang lupa sa ilalim na posibleng magdulot ng foundation failure.

Inihalintulad pa niya ito sa mga napaulat na problema noon sa ilang flood control project sa Pampanga.

Sa huli, umaasa ang residente sa agarang aksyon ng DPWH upang maiwasan ang posibleng trahedya sa Mabolo 3, Bacoor City.

20/05/2026

CAVITE PPO, MARIING KINONDENA ANG PAMAMARIL SA DASMARIÑAS NA IKINASAWI NG DALAWA

DASMARIÑAS CITY, Cavite — Mariing kinondena ng Cavite Police Provincial Office o Cavite PPO ang naganap na pamamaril sa Dasmariñas City na nagresulta sa pagkamatay ng dalawang indibidwal.

Ayon sa pahayag ni PCOL Ariel R. Red, kasalukuyan nang nagsasagawa ng masusi at komprehensibong imbestigasyon ang Dasmariñas Component City Police Station katuwang ang Cavite PPO upang agad na matukoy at maaresto ang mga responsable sa krimen.

Patuloy umanong nangangalap ng ebidensya ang mga awtoridad kabilang ang pagrerepaso ng CCTV footage, pakikipanayam sa mga saksi, at pagberipika sa lahat ng posibleng lead upang mapabilis ang paglutas sa kaso.

Tiniyak din ng Cavite PPO sa publiko na ginagamit na nila ang lahat ng magagamit na resources at operational efforts upang matunton, makilala, at maaresto ang salarin sa lalong madaling panahon.

Kabilang sa kanilang mga hakbang ang intelligence monitoring, dragnet operations, case build-up, at pakikipag-ugnayan sa iba pang law enforcement agencies.

Samantala, nagpahayag ng pakikiramay ang Cavite PPO sa mga naulilang pamilya ng mga biktima at tiniyak na mananatiling nakatuon ang Philippine National Police sa paghahatid ng hustisya nang may dedikasyon at propesyonalismo.

“Patuloy kaming magsasagawa ng lahat ng kinakailangang hakbang hanggang makamit ang hustisya at mapanagot ang mga nasa likod ng insidenteng ito,” pahayag ni PCOL Red.

Patuloy namang hinihikayat ng mga awtoridad ang publiko na makipagtulungan at magbigay ng anumang impormasyon na makatutulong sa agarang pagresolba ng kaso.

20/05/2026

SSS NAGLUNSAD NG LOAN CONDONATION PROGRAM PARA SA MGA MIYEMBRONG MAY LUMANG UTANG

Naglabas ng panibagong programa ang Social Security System o SSS na naglalayong matulungan ang mga miyembrong may mga hindi nabayarang loan mula pa noong dekada ‘90 hanggang unang bahagi ng 2000.

Ayon kay Ma. Regina Fababaer, maaaring makinabang ang mga miyembro sa inilunsad na Consolidation Loan Program kung saan maaaring ipagsama-sama ang kanilang mga dating pagkakautang tulad ng salary loan, calamity loan, emergency loan, at early renewal program loans.

Sa ilalim ng naturang programa, maaaring maalis o ma-waive ang mga naipong penalties ng mga delinquent loan.

May opsyon din ang mga miyembro na bayaran nang buo ang kanilang utang o kaya ay hulugan ito sa loob ng hanggang limang taon depende sa kabuuang halaga ng kanilang obligasyon.

Gayunman, nilinaw ng SSS na bagama’t maaaring alisin ang penalties, kinakailangan pa ring bayaran ng miyembro ang principal amount at interest ng kanilang loan.

Samantala, inihayag din ng ahensya ang Enhanced Emergency Loan Program para sa mga aktibong naghuhulog ng kontribusyon.

Kabilang sa mga benepisyo nito ang mas mababang interest rate na pitong porsyento at anim na buwang moratorium bago simulan ang pagbabayad ng loan.

Sa ilalim ng naturang programa, aabot sa 30 buwan ang kabuuang loan term ngunit 24 buwan lamang ang aktwal na hulugang babayaran dahil hindi kasama sa bilang ang anim na buwang moratorium.

Bukod sa mga miyembro, may inilaan ding programa ang SSS para sa mga employer sa pamamagitan ng Contribution Penalty Condonation, Delinquency Management and Restructuring Program.

Layunin nitong tulungan ang mga negosyo at household employers na maayos ang kanilang mga pagkakautang at mabawasan ang penalty charges, lalo na ang mga naapektuhan ng pagkalugi, economic crisis, at iba pang suliraning pinansyal.

20/05/2026

SDO CAVITE NANGUNA SA CERCON 2026 PARA SA MAKABAGONG EDUKASYON

Pinangunahan ng Schools Division Office of Cavite Province ang 2026 CALABARZON Educational Researchers’ Conference (CERCon) bilang bahagi ng pagsusulong ng makabago at pananaliksik na nakabatay na edukasyon sa rehiyon.

Dinaluhan ito ng mga g**o, mananaliksik, at opisyal ng edukasyon mula sa iba’t ibang dibisyon sa CALABARZON upang talakayin ang mga makabagong pag-aaral at pinakamahusay na praktis sa edukasyon.

Sa temang “Research and Digital Action: Paving CALABARZON’s Pathways to Accelerated, Collaborative and Future-Ready Quality Basic Education,” binigyang-diin sa tatlong araw na kumperensya ang kahalagahan ng pananaliksik at digital innovation sa pagpapabuti ng kalidad ng edukasyon at paghubog ng mga programang tutugon sa pangangailangan ng mga mag-aaral.

Ayon kina Assistant Regional Director Loida N. Nidea at Schools Division Superintendent Dr. Rosemarie D. Torres, mahalaga ang pananaliksik upang mapahusay ang pagtuturo, mapalakas ang learner outcomes, at makalikha ng mas epektibong polisiya at programa sa mga paaralan.

Samantala, ipinahayag naman ng mga lokal na opisyal ng Cavite ang kanilang suporta sa mga programang nagsusulong ng makabago at dekalidad na edukasyon.

Naging tampok din sa CERCon ang presentasyon ng mga pinakamahusay na research-driven practices mula sa iba’t ibang dibisyon, kabilang ang mga proyekto ng SDO Cavite Province at SDO San Pablo City na nakatulong sa pagpapabuti ng pagtuturo at suporta sa mga mag-aaral.

20/05/2026

FIRST-EVER FBSE TRAINING, ISINAGAWA SA PCU DASMA PARA SA MGA FUTURE HOSPITALITY PROFESSIONALS

Isang makasaysayang hakbang ang isinagawa ng graduating class ng College of Hospitality and Tourism Management ng Philippine Christian University–Dasmariñas matapos nilang lumahok sa kauna-unahang Filipino Brand of Service Excellence (FBSE) Training para sa Batch 2.

Layunin ng programa na ihanda ang mga mag-aaral bilang mga susunod na lider sa industriya ng hospitality at turismo sa pamamagitan ng pagpapalalim ng pagpapahalagang Pilipino sa larangan ng serbisyo.

Pinangunahan ang pagsasanay ni Nicolle Coronado mula sa Department of Tourism Region IV-A, kasama si Ma. Fe Cantilo-Rofule bilang resource speaker.

Sa isinagawang training, binigyang-diin ang kahalagahan ng malasakit, kagandahang-asal, at tunay na init ng pagtanggap na sumasalamin sa pusong Pilipino. Ibinahagi rin ang mga makabagong pamantayan sa world-class customer service na inaasahan sa larangan ng turismo at hospitality.

Ayon sa mga kalahok, naging mahalagang karanasan ang FBSE training dahil hindi lamang nito pinahusay ang kanilang kaalaman at kasanayan, kundi pinalalim din ang kanilang pag-unawa sa kahalagahan ng pagkakaroon ng makatao at makabayang serbisyo.

Ang matagumpay na pagsasagawa ng kauna-unahang FBSE training sa PCU–Dasmariñas ay patunay ng matibay na adhikain ng institusyon na makapaghubog ng mga propesyonal na may kahusayan, malasakit, at pagmamalaki sa kulturang Pilipino.

Sa pagtatapos ng programa, dala ng mga mag-aaral ang inspirasyon at kahandaan na maging mukha ng world-class Filipino hospitality, handa na tumanggap ng bawat bisita nang may puso at kahusayan.

20/05/2026

P8.3-M SHABU, NASABAT SA NAIA; CONSIGNEE TAGA-CAVITE

Timbog ang mahigit P8.3 milyong halaga ng hinihinalang shabu matapos masabat ng mga awtoridad sa isinagawang interdiction operation sa loob ng Ninoy Aquino International Airport (NAIA) nitong Martes.

Ayon sa ulat, nadiskubre ang kontrabando sa isang abandonadong shipment mula sa bansang Uganda, East Africa na idineklarang “Auto Gear Bearings.”

Nagsagawa ng operasyon ang Bureau of Customs (BOC), Inter-Agency Drug Interdiction Task Group, at PNP-Aviation Security Group sa isang warehouse sa NAIA matapos umanong magduda ang mga tauhan sa naturang kargamento.

Dumaan muna sa cargo X-ray screening ng BOC ang shipment bago isinailalim sa K9 inspection ng Philippine Drug Enforcement Agency (PDEA).

Sa masusing manual inspection, tumambad ang mga hinihinalang ilegal na droga na nakatago sa loob mismo ng aluminum gear bearings.

Tinaya ng mga awtoridad na aabot sa kabuuang 1,234 gramo ng hinihinalang shabu ang nakumpiska — binubuo ng 604 gramo at 630 gramo — na may tinatayang street value na P8,391,200.

Ang shipment ay nakapangalan umano sa isang residente ng Cavite na ngayon ay iniimbestigahan na ng mga awtoridad.

Samantala, agad namang isinuko sa PDEA national office ang mga nakuhang ilegal na droga para sa tamang disposisyon at mas malalim pang imbestigasyon.

Patuloy namang pinaigting ng mga otoridad ang pagbabantay sa mga paliparan upang mapigilan ang pagpasok ng ilegal na droga sa bansa.

20/05/2026

BRAND-NEW MOTOR NG COLLEGE STUDENT, TINANGAY NG 3 HOLDAPER

CARMONA CITY, Cavite — Isang 22-anyos na college student ang nabiktima ng umano’y “riding-in-tandem style” na carnapping matapos hablutin ng tatlong kalalakihan ang kanyang bagong biling motorsiklo madaling-araw nitong Miyerkules sa Brgy. Mabuhay.

Kinilala ang biktima na si alyas "Kharl", residente ng Brgy. Mabuhay, Carmona City.

Batay sa ulat ng Carmona CCPS, naganap ang insidente dakong ala-1:30 ng madaling-araw sa kahabaan ng Sugar Road, Brgy. Mabuhay.

Ayon sa imbestigasyon, naghihintay lamang umano ang biktima ng kanyang kakilala habang nakaupo sa kanyang brand-new Honda Click motorcycle malapit sa isang Dali Store nang lapitan siya ng tatlong hindi pa nakikilalang lalaki na sakay ng dalawang motorsiklo.

Una umanong inakala ng biktima na may itatanong lamang ang mga suspek, ngunit bigla na lamang siyang kinaladkad palayo sa kanyang motorsiklo ng isa sa mga ito.

Samantala, agad namang sumakay ang isa pang suspek sa motorsiklo ng biktima bago mabilis na tumakas ang grupo patungong direksyon ng Biñan, Laguna.

Kaagad namang nagtungo sa himpilan ng pulisya ang biktima kasama ang mga tauhan ng Mabuhay Sector upang iulat ang insidente dakong ala-2:30 ng madaling-araw.

Patuloy ngayon ang imbestigasyon ng mga awtoridad upang matukoy at maaresto ang mga responsable sa naturang krimen.

20/05/2026

TOP WANTED NG LALAWIGAN, TIMBOG SA OPERASYON NG PULIS

Mendez, Cavite — Kalaboso ang bagsak ng isang lalaki na kabilang sa Provincial Most Wanted Persons matapos masakote sa isinagawang manhunt operation ng mga tauhan ng Tagaytay Component City Police Station nitong Martes ng hapon.

Kinilala ang nadakip na suspek na si alyas “Mar,” 29-anyos at residente ng Mendez, Cavite.

Ayon sa pulisya, bandang alas-5:30 ng hapon nang arestuhin ang akusado sa Sitio Pulo, Brgy. Anuling Cerca 1, Mendez, Cavite sa bisa ng warrant of arrest kaugnay ng paglabag sa Section 5 at Section 11 ng RA 9165 o Comprehensive Dangerous Drugs Act of 2002.

Ang naturang warrant ay inilabas ng RTC Branch 134 sa Tagaytay City noong Mayo 14, 2026 para sa service of sentence.

Sa ulat, nagtulungan ang intelligence at warrant personnel ng Tagaytay police na nagresulta sa matagumpay na pagkakadakip sa akusado na matagal ding pinaghahanap ng batas.

Ipinaalam umano sa suspek ang kanyang mga karapatan alinsunod sa batas bago tuluyang dinala sa kustodiya ng Tagaytay CCPS.

Samantala, sinabi ni Cavite Police Provincial Director PCOL Ariel R. Red na magpapatuloy ang pinaigting na operasyon laban sa mga wanted person upang mapanatili ang kaayusan at seguridad sa lalawigan.

20/05/2026

8 TALAMPAKANG SAWA NAKAPULUPOT SA POSTE NG KURYENTE, GUMIMBAL SA MGA RESIDENTE

KAWIT, CAVITE — Nagdulot ng takot at pagkabigla sa mga residente ang isang dambuhalang sawa matapos mamataan na nakapulupot sa poste ng kuryente sa Brgy. Manggahan nitong Martes ng umaga, Mayo 19, 2026.

Ayon kay Ryzamart Rallos, 34 anyos na dishwasher sa isang restaurant, alas-10:00 ng umaga nang makita niya ang halos 8 talampakang sawa habang kukuha sana siya ng delivery sa lugar.

Kwento ni Rallos, una ay hindi niya agad napansin ang ahas dahil nakapulupot ito sa mataas na bahagi ng poste ng kuryente.

Ngunit nang kanyang matitigan ay laking gulat niya nang makitang isa pala itong malaking sawa.

Dahil sa takot na makapanakit ang naturang reptilya, agad niyang tinawagan ang kaibigang si Joebert upang tumulong sa paghuli sa sawa.

Matagumpay na nahuli ang ahas nang hindi nasasaktan ang sinuman sa lugar.

Kalaunan ay itinurn over ang nasabing sawa sa Kawit Municipal Environment and Natural Resources Office upang masig**ong maayos itong maalagaan at maibalik sa tamang habitat nito.

Patuloy namang pinaaalalahanan ng mga awtoridad ang publiko na agad ipagbigay-alam sa kinauukulan sakaling makakita ng mga ligaw na hayop upang maiwasan ang anumang panganib.

Cavite News Network

21/05/2026

21/05/2026

20/05/2026

20/05/2026

20/05/2026

20/05/2026

20/05/2026

20/05/2026

20/05/2026

20/05/2026

20/05/2026

Address

Website

Alerts

Shortcuts

Share

Category