29/08/2026
𝐔𝐒𝐒𝐆 𝐂𝐡𝐚𝐢𝐫 𝐏𝐨𝐛𝐥𝐞𝐭𝐞 𝐧𝐢𝐥𝐢𝐧𝐚𝐰 𝐚𝐧𝐠 𝐩𝐚𝐫𝐥𝐢𝐚𝐦𝐞𝐧𝐭𝐚𝐫𝐲 𝐩𝐫𝐨𝐜𝐞𝐝𝐮𝐫𝐞 𝐬𝐚 𝐑𝐞𝐩. 𝐀𝐬𝐬𝐞𝐦𝐛𝐥𝐲; 𝐓𝐮𝐫𝐧𝐨𝐯𝐞𝐫 𝐧𝐠 𝐩𝐨𝐧𝐝𝐨, 𝐢𝐬𝐢𝐧𝐮𝐥𝐨𝐧𝐠
Nilinaw ng University Supreme Student Government (USSG) ang mga usapin kaugnay ng parliamentary procedures na ipinatupad sa ginanap na 1st Representative Assembly noong Agosto 21.
Ayon sa inilabas na sulat ng USSG noong Huwebes, Agosto 27, nagsimula ang asembleya sa pagdetermina ng quorum, pagbasa ng house rules at adyenda sa pag-apruba ng action plan, ratipikasyon ng Constitution and By-Laws (CBL), at iba pang mga paksa na idinagdag ng isang presidente.
Sa isang eksklusibong panayam, iginiit ni USSG Chairperson at Presiding Officer Dane Lester P. Poblete na nakasunod sa Artikulo VII, Seksyon 2 ng USSG-CBL at sa Robert’s Rules of Order (12th Edition) ang lahat ng naging proseso sa naturang pagpupulong.
𝗣𝗮𝗴𝗹𝗶𝗹𝗶𝗻𝗮𝘄 𝘀𝗮 𝗕𝗼𝘁𝗼𝗵𝗮𝗻 𝗮𝘁 ‘𝗣𝗿𝗼𝘆𝗲𝗸𝘁𝗼 𝗨𝗻𝗼’
Naging pangunahing paksa sa deliberasyon ng asembleya ang pag-apruba sa action plan ng organisasyon, partikular na sa ‘Proyekto Uno’ na may nakalaang P120,000 para sa pagbili ng mga kagamitan sa opisina tulad ng speaker set, printer, camera at calculators na maaari ring hiramin ng mga mag-aaral at lokal na organisasyon.
“Ang pinaka-original na inilagay namin du’n na budgetary allocation ay 120,000. Sa [allocated budget] na ‘yon, included doon ang bagong speaker ng USSG, camera, bagong printer [at] ibang needs. Tapos yung ibang matitirang fund, ang proposed din du’n ng ibang council or ibang executive ay ibibili ng calculator at ibang office need na pwedeng ipahiram sa mga student natin para mas malawak yung scope ng project,” saad ni Poblete.
Ayon pa sa rehente, dumaan sa malalim na talakayan at transparent na botohan ang bawat item sa proyekto. Aniya, ipinaliwanag nila ang dahilan kung bakit may inilagay na proyekto sa action plan.
“After namin na ma-present ‘yung isang project, magkakaroon kami ng floor for debate kung sakali man na kailangan na mas maipaliwanag ng malalim kung ano ‘yung pinaka-aim ng proyekto. [Kapag] nagkaroon na kami ng deliberation, [tutuloy na sa] voting kung approve ba sila or hindi.”
Sinagot din ni Poblete ang usapin hinggil sa umano’y limitadong oras ng pagboto na kung saan ipinagkaloob sa mga kinatawan ang mosyon na palawigin ito mula 20 patungong 40 segundo.
“[Nang] magkaroon ng motion ang [Junior Philippine Society of Public Administration] President na gawin siyang 40 seconds, and ‘yung motion na ‘yun ay duly seconded by the body without objection… Pinayagan namin dahil gusto namin na masunod ang parliamentary procedure at gusto namin na democratic process ang mangyari sa representative assembly,” pahayag niya.
Isinaad din ni Poblete na inilalagay ng konseho ang bawat resulta ng botohan sa chatbox ng Google Meet upang magkaroon ng transparency.
Ipinaliwanag din ni Poblete na ginamit ang probisyon ng unanimous consent sa ilalim ng Robert’s Rules of Order upang makatipid ng oras, lalo’t walang nagpahayag ng pormal na pagtutol o objection habang isinasagawa ang deliberasyon.
𝗣𝗮𝗿𝘁𝗶𝘀𝗶𝗽𝗮𝘀𝘆𝗼𝗻 𝗮𝘁 𝗤𝘂𝗼𝗿𝘂𝗺 𝘀𝗮 𝗔𝘀𝗲𝗺𝗯𝗹𝗲𝘆𝗮
Pinalagan din ng USSG ang opisyal na pahayag na inilabas ng JPSPA-UCN na pinupuna ang umano’y paglilimita sa 500 ang partisipasyon ng mga mag-aaral sa ginanap na pagpupulong online.
“Papabulaanan ko [‘yung sinasabi nila na nililimitahan ang meeting sa 500] kasi nga wala naman kaming kapangyarihan na mas palawigin pa ang nasasakupan nitong 500 na ‘yan. Although nagbigay kami sa kanila ng [pangako] na gagawin namin ang best namin para i-live ‘yung representative assembly para makita ng mga estudyante pero up until consultation with the technical committee, sabi nila hindi nila kaya,” saad ni Poblete.
Dagdag pa niya, walang naging komunikasyon ang JPSPA-UCN sa USSG hinggil sa kanilang mga hinaing. Aniya, kung nais ng lokal na organisasyon na imbitahin ang lahat ng mag-aaral ng UCN, maari silang mag-request at maaari itong gawan ng paraan sa ikalawang asembleya.
Ayon sa konseho, ang ginanap na pulong ay isang Representative Assembly na eksklusibong nakalaan sa mga kinatawan tulad ng mga block mayor, local organization at system-wide presidents. Bagama’t pinahintulutan ang ibang estudyante na pumasok bilang observers, hindi umabot sa 200 ang pumasok sa virtual room.
“Ang official na inilabas naming memorandum for representative assembly, ang may voting power lang doon ay mga representative… Ang naging participants namin ay halos naglalaro lang sa 127 hanggang 150 pataas… Pero yung mga nag-attend naman ay sila yung nagko-consist ng quorum natin kaya nakaka-proceed kami sa business ng representative assembly,” dagdag pa ni Poblete.
𝗜𝘀𝘆𝘂 𝘀𝗮 𝗣𝗼𝗻𝗱𝗼 𝗮𝘁 𝗧𝘂𝗿𝗻𝗼𝘃𝗲𝗿 𝗻𝗴 𝗟𝗮𝗹𝗮𝗴𝗱𝗮𝗮𝗻𝗴 𝗗𝗼𝗸𝘂𝗺𝗲𝗻𝘁𝗼
Bukod sa usapin sa asembleya, inihayag ng USSG Student Regent ang matinding hamon sa pananalapi na kinakaharap ng kasalukuyang administrasyon dahil sa kawalan ng pormal na turnover mula sa nakaraang pamunuan.
Bunsod nito, nagpalabas ng hiwalay na memorandum ang USSG ukol sa pag-turnover ng mga dating USSG membership fee na kasalukuyang hawak ng ilang lokal na organisasyon at student governments.
“Ang inilabas namin na memo ay hindi siya patungkol sa pag-collect ng bagong membership fee ngayong academic year. Magkakaroon tayo ng collection ng bagong membership fee para sa academic year na ito pero kailangan muna naming ma-settle kung ano ba iyong mga pera na nasa bawat organization natin [mula sa] previous administration para maayos din namin yung liquidation and financial report,” saad ni Poblete.
Dagdag pa niya, ang pondong makukuha ay ilalaan sa mga proyekto, aktibidad at reimbursement ng konseho, kabilang na ang pagkakaloob ng P10,000 badyet para sa special election na ginanap noong Agosto 26 ng Commission on Student Elections.
Nakatakda ring magsumite ang USSG ng mga kinakailangang dokumento para sa reaccreditation bago ang Setyembre 1, ngunit nahihirapan pa ito dahil wala pa sa kanilang hawak ang mga accomplishment, financial at liquidation report mula sa nakaraang administrasyon.
“Ilang beses na kaming nag-letter at wala pa rin sa aming response ang former chairperson… Nagpa-receive kami ng letter sa College of Education Dean’s Office na humihingi na rin kami ng tulong para sa pagpa-turn over ng kung anong meron sa former admin kasi talaga sa ngayon, nahihirapang gumalaw ang USSG lalo’t alam naman natin na ang pinaka-basic fundamental ng isang organization ay ang finance,” giit ng Student Regent.
Samantala, nanawagan ang USSG sa mga lider-estudyante na dumaan sa tamang komunikasyon at suriin ang mga alituntunin ng parliamentary procedure bago maglabas ng mga pahayag sa social media upang maiwasan ang pagkakahati-hati ng mga organisasyon sa pamantasan.
Sa kasalukuyan, hinihingi ng Breakthrough ang opisyal na minutes of the meeting ng nasabing pagpupulong para sa mas malalim na pagsasagawa ng paglilinaw at beripikasyon.
Ulat nina | Dessa Mae C. Tuyay, 𝘊𝘰𝘱𝘺 𝘌𝘥𝘪𝘵𝘰𝘳; Yvan M. Delos Santos, 𝘌𝘥𝘪𝘵𝘰𝘳-𝘪𝘯-𝘊𝘩𝘪𝘦𝘧
Isinaayos ni | Seplorenz S. Alarma, 𝘓𝘢𝘺𝘰𝘶𝘵 𝘌𝘥𝘪𝘵𝘰𝘳
