13/08/2026
Autostrada është përgjegjësi e Ministrisë, por kam përgjegjësi morale për përfundimin e saj
Kryetari i Komunës së Gjilanit, në një intervistë për Radio Star, ka folur për projektin e autostradës që lidh Gjilanin me Prishtinën, duke sqaruar se përgjegjësia institucionale për realizimin e projektit nuk i takon komunës.
Ai tha se punët në autostradë janë në kompetencë të Ministrisë, ndërsa theksoi se, pavarësisht kësaj, si kryetar i Gjilanit e ndien përgjegjësi morale që vazhdimisht të kërkojë dhe të shtyjë përpara përfundimin sa më të shpejtë të projektit.
“Unë nuk kam përgjegjësi për punët në autostradë, ato i takojnë Ministrisë, por kam përgjegjësi morale që vazhdimisht ta shtyj përpara përfundimin sa më të hershëm të këtij projekti jetik për qytetarët e Gjilanit”, tha ai.
Sipas tij, deri tani është përfunduar dhe asfaltuar rreth 50% e gjatësisë totale të rrugës. Ai shtoi se edhe pjesa tjetër e segmentit është e kalueshme, por kërkon kujdes të shtuar nga pjesëmarrësit në komunikacion.
Projekti i autostradës drejt Gjilanit konsiderohet një nga projektet më të rëndësishme infrastrukturore për qytetin, ndërsa përfundimi i tij pritet të ndikojë në lidhjen e Gjilanit me Prishtinën dhe në qarkullimin e qytetarëve dhe bizneseve.
Kryetari i Gjilanit tha se do të vazhdojë të kërkojë që projekti të përfundojë sa më shpejt, pavarësisht se realizimi i punimeve është përgjegjësi e institucioneve qendrore.
