10/06/2026
HIGH-VALUE INDIVIDUAL, ARESTADO SA BUY-BUST OPERATION SA NEW WASHINGTON; P13,600 NGA BALOR IT SHABU, NAKUMPISKA
Arestado it mga awtoridad ro sangka high-value individual sa ginkasa nga buy-bust operation sa banwa it New Washington makaron nga adlaw, Hunyo 10.
Ginkilaea ro suspek sa alias nga "Tonet," 39-anyos, may asawa, sangka laborer, ag residente mismo sa nasambit nga lugar.
Nasayran sa report it pulisya nga nag-abot sa kapin sa daywang gramo it kabilugan nga shabu ro nakumpiska sa suspek nga nagabalor it P13,600 base sa Standard Drug Price.
Do operasyon hay ginpangunahan it Aklan Police Drug Enforcement Unit ukon PDEU sa idaeom ni PMAJ Jerome S. Manahan, sa kooperasyon it PDEA, New Washington MPS, ag Aklan MARPSTA.
Nadakpan si Tonet matapos magbaligya it sambato ka heat-sealed transparent plastic sachet it gina-alegar shabu sa sangka poseur-buyer nga pulis, ag kat i-body search hay narekober pa gid kana ro dugang nga ap-at ka sachets.
Kaibahan sa nabuoe sa posisyon it suspek ro buy-bust money nga nagabalor it P2,100 ag dugang nga P150 nga anang personal nga kwarta.
Ginpahayag ni PCOL Arnel E. Ramos, Provincial Director it Aklan PPO, nga padayon ro andang pagpabaskog sa kampanya kontra sa ilegal nga droga ag padayon man ro andang pag-apela sa publiko nga ireport ro kaparehong aktibidad sa andang komunidad para sa kaeuwasan it mga Aklanon.
Courtesy: Aklan Police Provincial Office
