10/11/2025
باغ میں خبر شائع کرنے پر صحافی کو کالعدم تنظیم کی دھمکیاں
آزاد کشمیر کے ضلع باغ سے تعلق رکھنے والے ینگ جرنلسٹس فورم باغ کے صدر اور ورکنگ جرنلسٹ سردار اویس کو خبر شائع کرنے پر مبینہ طور پر کالعدم تنظیم سے تعلق رکھنے والے عناصر کی جانب سے جان سے مارنے کی دھمکیاں موصول ہوئی ہیں۔
ذرائع کے مطابق دو روز قبل سردار اویس نے ایک خبر شائع کی تھی جس میں مبینہ طور پر انکشاف کیا گیا تھا کہ ایک افغان ٹھیکیدار اور بلدیہ باغ کے کچھ اہلکاروں کی ملی بھگت سے عوام کو لاکھوں روپے کا نقصان پہنچایا گیا ہے۔
خبر کے شائع ہونے کے ایک روز بعد سردار اویس کو واٹس ایپ پر ایک ایرانی نمبر سے کال موصول ہوئی۔ کال کرنے والے شخص نے اپنا تعلق کالعدم تنظیم "ٹی ٹی پی" سے ظاہر کرتے ہوئے کہا کہ اگر آئندہ خستہ گل نامی ٹھیکیدار کے خلاف کوئی خبر نشر یا شائع کی گئی تو انہیں "ختم" کر دیا جائے گا۔
دھمکیاں موصول ہونے کے بعد سردار اویس نے واقعے کی اطلاع تھانہ سٹی باغ کو دی اور باضابطہ درخواست جمع کروا دی۔ انہوں نے امید ظاہر کی ہے کہ پولیس اس معاملے میں جلد کارروائی کرے گی۔
دوسری جانب، ینگ جرنلسٹس فورم جموں و کشمیر ، آزاد گروپ اسلام آباد اور ورکنگ جرنلسٹس فورم باغ نے اس واقعے کی شدید مذمت کرتے ہوئے کہا ہے کہ صحافیوں کو اپنی پیشہ ورانہ ذمہ داریوں کی ادائیگی پر اس طرح کی دھمکیاں قابلِ قبول نہیں۔اس سے قبل بھی تین درخواستیں تھانہ باغ کو دی گئیں جن پر کوئی کارروائی نہیں ہو سکی۔
تنظیم کے مرکزی بانی صدر نعیم چغتائی کے مطابق اگر اس واقع کا پراپر نوٹس نا لیا گیا تو شدید ردعمل دے سکتے ہیں ۔
اس سلسلے میں وائے جے ایف اور دیگر صحافتی تنظیمات سے بھی اس معاملے پر مشاورت مکمل کر لی گئی ہے۔
فورم کی قیادت نے اس واقعے کے خلاف پونچھ ڈویژن سمیت مرکزی اجلاس بلانے کا اعلان کیا ہے تاکہ ورکنگ صحافیوں کے تحفظ اور ممکنہ خطرات سے نمٹنے کے لیے عملی حکمتِ عملی ترتیب دی جا سکے۔
جیے صحافی جیے صحافت
