Pakhtunkhwa Insight

06/06/2026

06/06/2026

مکین جنوبی وزیرستان اپر میں وزیرستان ویلفیئر فاؤنڈیشن کی جانب سے ایمبولینس سروس کی افتتاح کردی گءی

جنوبی وزیرستان اپر: جنوبی وزیرستان اپر کے علاقے مکین میں وزیرستان ویلفیئر فاؤنڈیشن کی جانب سے عوام کو فوری طبی سہولیات کی فراہمی کے لیے ایمبولینس سروس کی باقاعدہ افتتاح کر دی گئی۔ افتتاحی تقریب میں مقامی عمائدین، سماجی شخصیات اور مختلف شعبہ ہاءے زندگی سے تعلق رکھنے والے افراد نے بڑی تعداد میں شرکت کی۔

تقریب میں نیشنل ڈیموکریٹک موومنٹ (این ڈی ایم) کے صوبائی ترجمان گلبدین محسود، محسود پریس کلب کے صدر شیریار محسود، مکین مارکیٹ کمیٹی کے صدر ملک ریاض محسود سمیت دیگر معززین بھی موجود تھے۔

وزیرستان ویلفیئر فاؤنڈیشن کے منتظمین نے اس موقع پر خطاب کرتے ہوئے کہا کہ فاؤنڈیشن نے مختصر عرصے میں زراعت، غربت کے خاتمے اور صحت کے شعبے میں نمایاں اقدامات کیے ہیں۔ ان کا کہنا تھا کہ جنوبی وزیرستان اپر جیسے دور افتادہ اور شورش زدہ علاقے میں فوری طبی امداد کی فراہمی کے لیے تین ایمبولینسز فراہم کی گئی ہیں تاکہ مریضوں کو بروقت علاج کی سہولت میسر آسکے۔

محسود پریس کلب کے صدر شیریار محسود نے تقریب سے خطاب کرتے ہوئے کہا کہ محسود پریس کلب کے صحافی علاقے کے باصلاحیت اور خدمتِ خلق کے جذبے سے سرشار نوجوانوں کے شانہ بشانہ کھڑی رہی ہے اور آیندہ بھی ساتھ دے گی تاکہ لوگوں کی مشکلات کم ہوں ۔ انہوں نے ویلفیئر فاؤنڈیشن کی خدمات کو سراہتے ہوئے کہا کہ ایسے اقدامات علاقے کی ترقی اور عوامی فلاح کے لیے نہایت اہم ہیں۔
این ڈی ایم کے صوبائی ترجمان گلبدین محسود نے اپنے خطاب میں کہا کہ شوال جیسے پسماندہ علاقے سے تعلق رکھنے والے نوجوانوں نے انتہائی کم وقت میں وزیرستان کے مختلف علاقوں میں فلاحی کاموں کے ذریعے اپنی صلاحیتوں کا لوہا منوایا ہے۔ انہوں نے کہا کہ جنوبی وزیرستان اپر کے عوام کے لیے تین ایمبولینسز کی فراہمی ایک قابلِ تحسین اقدام ہے اور ایسے باصلاحیت نوجوانوں کی حوصلہ افزائی اور معاونت ہم سب کی ذمہ داری ہے۔
تقریب کے اختتام پر شرکاء نے وزیرستان ویلفیئر فاؤنڈیشن کی خدمات کو سراہتے ہوئے امید ظاہر کی کہ مستقبل میں بھی علاقے میں فلاحی اور عوامی منصوبے جاری رہیں گے۔

05/06/2026

جنوبی وزیرستان: سراروغہ میں آل سیاسی اتحاد کا احتجاجی مظاہرہ، غیر اعلانیہ کرفیو اور انٹری پوسٹوں کے خاتمے کا مطالبہ

جنوبی وزیرستان اپر کے علاقے سراروغہ میں آل سیاسی اتحاد کے زیر اہتمام اپنے مطالبات کے حق میں ایک پُرامن احتجاجی مظاہرہ کیا گیا، جس میں مختلف سیاسی و سماجی حلقوں سے تعلق رکھنے والے افراد نے شرکت کی۔
مظاہرین نے ہاتھوں میں بینرز اور پلے کارڈز اُٹھا رکھے تھے جن پر غیر اعلانیہ کرفیو کے خاتمے، مختلف مقامات پر قائم انٹری پوسٹوں کے خلاف اور آبادی پر مارٹر گولے گرنے کے واقعات کی روک تھام کے مطالبات درج تھے۔
مظاہرے سے خطاب کرتے ہوئے مقررین نے کہا کہ علاقے میں آئے روز غیر اعلانیہ کرفیو کے نفاذ کے باعث عوام کے معمولاتِ زندگی شدید متاثر ہو رہے ہیں۔ ان کا کہنا تھا کہ کاروباری سرگرمیاں، تعلیم اور روزمرہ نقل و حرکت مسلسل مشکلات کا شکار ہیں جبکہ جگہ جگہ قائم انٹری پوسٹوں کی وجہ سے شہریوں کو اضافی پریشانی کا سامنا کرنا پڑ رہا ہے۔
مقررین نے الزام عائد کیا کہ علاقے سے متعلق اہم فیصلے مقامی سیاسی قیادت اور عوامی نمائندوں سے مشاورت کے بغیر کیے جا رہے ہیں، جس کے باعث عوام میں بے چینی اور تحفظات بڑھ رہے ہیں۔ انہوں نے مطالبہ کیا کہ مقامی مسائل کے حل اور امن و استحکام کے قیام کے لیے مقامی آبادی کو اعتماد میں لیا جائے۔
احتجاجی مظاہرے کے شرکاء نے کہا کہ آبادی پر مارٹر گولے گرنے کے واقعات سے شہریوں میں خوف و ہراس پھیل رہا ہے اور قیمتی جانوں و املاک کو خطرات لاحق ہیں۔ انہوں نے مطالبہ کیا کہ ایسے واقعات کی فوری روک تھام کے لیے مؤثر اقدامات کیے جائیں اور عوام کے جان و مال کے تحفظ کو یقینی بنایا جائے۔
مظاہرین نے اپنے مطالبات کی منظوری تک پُرامن جدوجہد جاری رکھنے کے عزم کا اظہار کرتے ہوئے متعلقہ حکام سے فوری نوٹس لینے کا مطالبہ کیا۔

04/06/2026

ٹانک. ڈپٹی کمشنر ٹانک جمشید خان کی ہدایات کی روشنی میں اسسٹنٹ ڈائریکٹر لوکل گورنمنٹ ٹانک حلیم شاہ کنڈی نے ٹانک سٹی کی مختلف گلیوں میں لوکل گورنمنٹ کے زیرِ اہتمام جاری پائپ لائن منصوبے کا تفصیلی معائنہ کیا۔

دورے کے دوران انہوں نے جاری ترقیاتی کاموں کی رفتار، معیار اور پیش رفت کا جائزہ لیا، ٹھیکیدار کو سختی سے ہدایت کی کہ پائپ لائن کی تنصیب مقررہ معیار کے مطابق اور بروقت مکمل کی جائے۔ انہوں نے واضح کیا کہ ناقص یا کم معیار کے پائپ کسی صورت قبول نہیں کیے جائیں گے جبکہ کام میں سستی، غفلت یا تاخیر برداشت نہیں کی جائے گی۔
منصوبہ جلد از جلد مکمل کرنے کی ہدایات جاری کیں۔

01/06/2026

عید صفائی انتظامات میں غفلت، جنوبی وزیرستان اپر کے 2 افسران سے وضاحت طلب

جنوبی وزیرستان اپر کے ڈپٹی کمشنر عصمت اللہ نے عیدالاضحیٰ کے دوران ناقص صفائی انتظامات اور قربانی کے جانوروں کی آلائشیں بروقت نہ اٹھانے پر دو اہم افسران کے خلاف کارروائی کرتے ہوئے شوکاز نوٹس جاری کر دیے ہیں۔ اس سلسلے میں اسسٹنٹ ڈائریکٹر لوکل گورنمنٹ اینڈ رورل ڈویلپمنٹ جنوبی وزیرستان اپر انور سعید اور تحصیل میونسپل آفیسر لدھا/سرواکئی مس ہما سعد سے دو دن کے اندر وضاحت طلب کی گئی ہے۔
مراسلوں کے مطابق چیف سیکرٹری خیبرپختونخوا کی واضح ہدایات کے باوجود مختلف علاقوں میں صفائی ستھرائی کے مؤثر انتظامات نہ کیے جا سکے۔ نوٹس میں کہا گیا ہے کہ قربانی کے جانوروں کی آلائشیں، کچرا اور دیگر فضلہ بروقت نہ اٹھانے کے باعث عوام کو شدید مشکلات کا سامنا کرنا پڑا جبکہ مجموعی صفائی صورتحال غیر تسلی بخش رہی۔
ڈپٹی کمشنر کی جانب سے جاری نوٹس میں تحصیل سراروغہ کے علاقے کوٹکئی کی صفائی صورتحال پر خصوصی تشویش کا اظہار کیا گیا ہے۔ مراسلے کے مطابق مانیٹرنگ ٹیموں نے فیلڈ وزٹ کے دوران کوٹکئی میں ناقص صفائی اور کچرے کے ڈھیر کی نشاندہی کی تھی، جس پر فوری اقدامات کی ہدایات بھی جاری کی گئیں، تاہم اس کے باوجود متعلقہ علاقوں میں کافی دیر تک صفائی نہ ہو سکی۔
نوٹس میں اس صورتحال کو متعلقہ افسران کی غفلت، ناقص منصوبہ بندی اور غیر مؤثر نگرانی قرار دیا گیا ہے۔ ضلعی انتظامیہ کے مطابق ناقص صفائی انتظامات سے نہ صرف عوامی مشکلات میں اضافہ ہوا بلکہ جنوبی وزیرستان اپر ضلعی انتظامیہ کی کارکردگی بھی متاثر ہوئی۔
دونوں افسران کو ہدایت کی گئی ہے کہ وہ 2 روز کے اندر اپنی تحریری وضاحت جمع کرائیں اور صفائی میں تاخیر کی وجوہات، صورتحال بہتر بنانے کے لیے اٹھائے گئے اقدامات اور ذمہ دار عوامل سے آگاہ کریں۔ ڈپٹی کمشنر نے خبردار کیا ہے کہ غیر تسلی بخش جواب کی صورت میں متعلقہ قواعد و ضوابط کے تحت مزید کارروائی عمل میں لائی جائے گی۔

29/05/2026

ڈیرہ اسماعیل خان ۔اے ڈی سپورٹس محکمہ ایجوکیشن ڈیرہ اسماعیل خان غلام ربانی ایم پی اے علی امین گنڈہ پور کے سامنے عید کے موقع پر ناگن ڈانس کا مظاہرہ کر رہے ہیں ۔
اس سے اندازہ لگایا جا سکتا ہے کہ خیبرپختونخوا میں عہدوں پر کیسے لوگوں کو بٹھایا جاتا ہے اور یہ بھی سوچ سکتے ہیں کہ صوبے کے انتظامی معاملات کیسے لوگوں کے ہاتھوں میں ہے

27/05/2026

*ضلع پولیس آفس، جنوبی وزیرستان اپر*
*عید الاضحیٰ 2026*

عید الاضحیٰ کے پرمسرت موقع پر ضلع جنوبی وزیرستان اپر پولیس کی جانب سے ضلع بھر میں امن و امان، سیکیورٹی، ٹریفک مینجمنٹ اور عوامی سہولت کی فراہمی کے فرائض سرانجام دینے والے پولیس اہلکاروں کی فلاح و بہبود اور حوصلہ افزائی کے لیے خصوصی اقدامات کیے گئے۔ عید ڈیوٹی پر تعینات اہلکاروں میں مٹھائی تقسیم کی گئی جبکہ متعلقہ پولیس اسٹیشنز، چوکیات اور ڈیوٹی پوائنٹس پر ان کے لیے گوشت اور خصوصی کھانے کے مناسب انتظامات بھی یقینی بنائے گئے تاکہ دورانِ ڈیوٹی اہلکاروں کی ویلفیئر اور حوصلہ افزائی کو یقینی بنایا جا سکے۔

ضلع پولیس سربراہ جنوبی وزیرستان اپر نے اس موقع پر کہا کہ عید جیسے مذہبی تہوار کے دوران اپنے اہل خانہ سے دور رہ کر عوام کے جان و مال کے تحفظ، امن و امان کے قیام اور شہریوں کو پرامن ماحول فراہم کرنے والے پولیس اہلکار ادارے کا قیمتی اثاثہ ہیں۔ ان کی قربانیاں، پیشہ ورانہ وابستگی اور احساسِ ذمہ داری قابل تحسین ہے، لہٰذا ان کی ویلفیئر، حوصلہ افزائی اور بہتر سہولیات کی فراہمی ادارے کی اولین ترجیحات میں شامل ہے۔

جنوبی وزیرستان اپر پولیس عید الاضحیٰ کے موقع پر عوام کو محفوظ، پرامن اور خوشگوار ماحول کی فراہمی کے لیے پوری ذمہ داری اور پیشہ ورانہ انداز میں اپنے فرائض سرانجام دے رہی ہے۔

27/05/2026

محسود پریس کلب کی طرف سے تمام دوستوں کو عید الاضحی مبارک ہو اور اسی مناسبت سے ان سیاحوں کے لئے ایک خصوصی پیغام بھی جو سیر کے لیے وزیرستان جانا چاہتے ہیں۔۔۔!

26/05/2026

گاؤں اوسپاس کی عید سوگوار, نوجوان جاں بحق

جنوبی وزیرستان: مویشی منڈی میں دو فریقین کی فائرنگ، راہگیر نوجوان جاں بحق، بھتیجا زخمی

وانا : جنوبی وزیرستان کے علاقے بروند کی مویشی منڈی میں دو فریقین کے مابین اچانک فائرنگ کا تبادلہ ہوا، جس کی زد میں آکر مویشی خریدنے کے لیے آیا ہوا ایک بے گناہ راہگیر نوجوان جاں بحق اور اس کا بھتیجا شدید زخمی ہو گیا۔

ذرائع کے مطابق، جاں بحق ہونے والے نوجوان کی شناخت مصطفیٰ نور کے نام سے ہوئی ہے، جو گاؤں 'اوسپاس' کا رہائشی اور سینئر صحافی حمزہ محسود کا چچا زاد بھائی تھا۔ مصطفیٰ نور عید یا گھریلو ضرورت کے لیے مویشی خریدنے منڈی آیا تھا کہ فریقین کی اندھا دھند فائرنگ کا نشانہ بن گیا۔

واقعے کے بعد علاقے میں کہرام مچ گیا اور زخمی نوجوان کو فوری طور پر قریبی ہسپتال منتقل کر دیا گیا ہے۔ مقتول مصطفیٰ نور کی میت ان کے آبائی گاؤں منتقل کر دی گئی ہے، جہاں آج ان کی نمازِ جنازہ ادا کرنے کے بعد انہیں آبائی قبرستان (اوسپاس) میں سپردِ خاک کیا جائے گا۔ پولیس نے واقعے کی تحقیقات شروع کر دی ہیں۔

25/05/2026

جنوبی وزیرستان؛ خصوصی افراد کےلیے امدادی سامان کی تقسیم، حکومتِ خیبر پختونخوا کا ایک اور عملی اقدام

خیبر پختونخوا کے قبائلی ضلع جنوبی وزیرستان آپر کے خصوصی افراد کی فلاح و بہبود کےلیے ایک اور اہم اور عملی قدم مکمل کر لیا گیا۔ محکمہ سوشل ویلفیئر جنوبی وزیرستان آپر کے زیرِ اہتمام خصوصی افراد میں امدادی و معاونتی سامان کی تقسیم کی تقریب کامیابی کے ساتھ منعقد ہوئی، جسے عوامی حلقوں نے حکومتِ خیبر پختونخوا کی خصوصی دلچسپی اور مسلسل عوامی خدمت کا واضح ثبوت قرار دیا ہے۔
یہ امدادی سامان اُن خصوصی افراد میں تقسیم کیا گیا جنہوں نے پہلے سے آن لائن درخواستیں جمع کروائی تھیں اور جن سے محکمہ سوشل ویلفیئر کی جانب سے رابطہ بھی مکمل کیا جا چکا تھا۔ یہ سامان ضلع ٹانک میں قائم سوشل ویلفیئر آفس میں تقسیم کیاگیا، جہاں مستحق افراد کو الیکٹرک ویل چیئرز، عام ویل چیئرز، سلائی مشینیں، ہیرنگ ایڈز، ٹرائی سائیکلز اور واکرز فراہم کیےگئے۔
عوامی و سماجی حلقوں کا کہنا ہے کہ یہ اقدام صرف امدادی سامان کی تقسیم تک محدود نہیں بلکہ اُن محروم اور نظرانداز طبقات کے حقوق کی بحالی کی جانب ایک عملی پیش رفت ہے، جنہیں ماضی میں صرف وعدوں تک محدود رکھا گیا تھا۔ خصوصی افراد اور اُن کے اہل خانہ نے اس اقدام کو امید کی ایک نئی کرن قرار دیتے ہوئے حکومت اور متعلقہ حکام کا شکریہ ادا کیا۔
اس موقع پر زکوٰۃ چیئرمین جنوبی وزیرستان آپر عمران محسود نے کہا کہ پاکستان تحریک انصاف کی قیادت عوامی خدمت پر یقین رکھتی ہے اور عملی اقدامات کے ذریعے لوگوں کی زندگیوں میں آسانیاں پیدا کرنا ہی اُن کا مشن ہے۔ اُنہوں نےکہاکہ حقیقی عوامی نمائندہ وہی ہوتا ہے جو اپنے لوگوں کے دکھ درد کو محسوس کرے اور ہر مشکل وقت میں اُن کے ساتھ کھڑا رہے۔
انہوں نے مزید کہا کہ تحریکِ انصاف صرف نعروں اور دعوؤں کی سیاست پر یقین نہیں رکھتی بلکہ عملی اقدامات کے ذریعے عوام کی زندگیوں میں مثبت تبدیلی لانے کےلیے کوشاں ہے۔ ان شاء اللہ جنوبی وزیرستان آپر کے خصوصی افراد، یتیموں، بیواؤں اور دیگر محروم خاندانوں کی خدمت کا یہ سفر آئندہ بھی اسی جذبے اور خلوص کے ساتھ جاری رکھا جائے گا۔