10/05/2026
Amwe ku makuru agize iminsi avurwa muri Amerika ku gihano co gupfa cahomvye aho umufungwa yatewe umuti wica incuro zibiri ntiyapfa bitangaza benshi bituma mbere umukuru w'amabohero muri Tenessee atanga imihoho
Hagizi iminsi havurwa igihano co gupfa cahomvye muri leta ya Tennessee imwe mu ma leta yo muri Amerika, igihano cari kugirirwa Christa Pike, aho uyu mufungwa yatewe umuti wica (injection létale )kabiri kose ntiyapfa mu gihe amakungu yose yari ashinze amaso iki gihano uko kiza kugenda, hari haciye imyaka 200 ata mufungwa w'umukenyezi akorewe iki gihano muri iyi leta.
Christa Gail Pike ni umugore w’imyaka 50 amaze imyaka irenga 30 ari mw’ibohero rifungirwamwo abanyororo baciriwe urubanza rw’urupfu muri leta ya Tennessee muri Amerika. Ku wa 30 Nyakanga 2026, igikorwa co kumwica hakoreshejwe umuti wica carageragejwe kirananirwa, bituma Pike ajanwa kwa muganga kandi bica bituma leta ya Tennessee ihagarika vyihuta igihano co gupfa ku bandi bafungwa muri uyu mwaka.
Inkuru ya Christa Pike yatanguriye mu mwaka wa 1995, igihe yari afise imyaka 18. Yaciriwe urubanza rwo kwica mugenzi we Colleen Slemmer, umwigeme w’imyaka 19 bari bahuriye mu mugambi wa Job Corps i Knoxville, muri Tennessee, amwikeka ko ashaka kumwiba umukunzi.
Mu mwaka wa 1996, sentare yamusanze yagirwa n’iki caha co kwica umuntu ku rwego rwo hejuru, maze imucira urubanza rwo gupfa, Pike aca aba umwe mu bantu baciriwe urwo rubanza rwo gupfa muri Tennessee hari haciye imyaka 200 ata muntu w'igitsina gore yishwe kubera urubanza rwo gupfa muri Tennessee
Kuva muri Ntwarante 1996, Pike yari afungiwe mu gasho, aho yari amaze imyaka irenga 30 arindiriye ko urubanza rushirwa mu ngiro akicwa.
Mu myaka yakurikiye, abamuburanira bagumye bashikiriza sentare imvo zitandukanye zo gusubira kuraba urubanza rwiwe.
Abamuburanira bavuga ko mu gihe c'urubanza rwo mu 1996, amakuru akomeye yerekeye ubuzima bwa Pike akiri umwana, harimwo ihohoterwa rikomeye yavuze ko yagiriwe, hamwe n’ibibazo vyerekeye amagara yiwe yo mu mutwe, bitashikirijwe sentare ku rugero rukwiye.
Mu mwaka wa 2026 Ishirahamwe ry’Abanyamerika ryitaho Uburenganzira bwa kiremwa Muntu, IACHR, ryasohoye icegeranyo ku rubanza rwiwe. Iryo shirahamwe ryavuze ko abamuburanira mu rubanza rwa mbere batashoboye gushikiriza neza amakuru yofashije sentare kumenya amateka yiwe n’ibindi vyari bikwiye kwitabwaho mu gihe co kumucira igihano c’urupfu.
IACHR kandi ryavuze ko imyaka myinshi Pike yamaze ari mw’ibohero ry’abaciriwe urwo gupfa, harimwo igihe kirekire yamaze atandukanye n’abandi bantu, cari ikibazo gikomeye kijanye n’uburenganzira bwa muntu. Iryo shirahamwe ryarasavye ko igihano ciwe gisubirwamwo kandi kigahindurwa kikaba ugufungwa ubuzima bwose.
Ku wa 30 Nyakanga 2025, Sentare Nkuru ya Tennessee yashizeho itariki yo gushira mu ngiro igihano ca Pike
Ivyo vyasigura ko Pike yari gutandukanywa n’abandi bagore bari mw’ibohero rifungirwamwo abaciriwe urwo gupfa kugira abe umugore wa mbere agiye kwicwa na Reta ya Tennessee mu myaka irenga 200.
Mu mpera za Nzero 2026, abamuburanira barongeye kugerageza guhagarika iryo yicwa, cane cane bashingiye ku bibazo bijanye n’amateka yiwe yo mu bwana hamwe n’uburyo Tennessee yari yateguye gukoresha mu kumwica.
Ku wa 30 Nyakanga 2026, Pike yategerezwa kwicwa mu gasho ka Riverbend Maximum Security Institution i Nashville. Mu masaha yo mu gitondo, hari Sentare yahagaritse vy’imfatakibanza iryo yicwa kugira isuzume zimwe mu mpamvu zari zatanzwe n’abamuburanira. Ariko Leta ya Tennessee yaranse iyo ngingo muri Sentare nkuru ya Amerika. Iyo sentare yahavuye ikuraho iyo ngingo, bituma Tennessee ironka uburenganzira bwo kubandanya igikorwa co gushira mu ngiro urubanza.
Mu mugoroba w'uwo musi, abategetsi ba Tennessee baragerageje gushira mu ngiro igihano ca Pike hakoreshejwe urushinge rw’umuti wica, ariko igikorwa nticagenze nk’uko cari gitegekanijwe. Nk’uko abamuburanira babivuze, Pike yatewe incuro zibiri umuti wateguwe kugira uce utuma apfa, ariko ntiyapfuye.
Abategetsi ba Tennessee bavuze ko bakurikije uburyo bwemewe bwo gushira mu ngiro igihano c’urupfu. Pike yaciye ata ubwenge ajanwa mu bitaro kugira avurwe bica bisa n'uko Tennessee ikoze ibara mu gihe yari yateguye gutanga igihano co gupfa hakoreshejwe uburyo bugezweho bw'umuti batera umufungwa kugira apfe atababaye, yamara biranka kandi amakungu ariko arorera.
Ni ibintu bidasanzwe cane, amakuru yatangajwe avuga ko Pike ari umwe mu bantu bazwi ko barokotse igikorwa nk’ico aho umuti wari wagenewe kumwica bawumuteye ubwa mbere aguma ababara arababwira abari aho ko ariko ababara hama bamutera uwundi biranka ahubwo bamukurayo ari indembe arata n'ubwenge.
Inyuma y’ivyo vyabaye, Bill Lee, buramatari wa Tennessee, yategetse ko iyicwa ry’abandi banyororo ryari ritegekanijwe muri uwo mwaka rihagarikwa.
Yategetse kandi ko hakorwa isuzuma ryigenga kugira hamenyekane neza icatumye igikorwa co kwica Pike kidakunda.
kuwa 2 Gitugutu 2026, abamuburanira batangaje ko Pike yari akiri mu bitaro aremvye cane ariko ko yari akiri muzima
Amakuru mashasha yo ku wa 3 Gitugutu 2026 avuga ko Christa Pike akiri mu bitaro, aho ariko aravurirwa inyuma y’ico gikorwa co kumwica kitagenze neza. Ayandi makuru yemeza ko uwurongoye amabohero muri Tennessee Frank Strada yahavuye atanga imihoho inyuma y'ihomba ry'iki gihano co gupfa cakorerwa Pike.
Ikibazo gikomeye gisigaye ni ukumenya ibizokurikira mu vy’amategeko, nimba Tennessee izosubira gusaba gushira mu ngiro igihano ciwe, canke nimba urubanza rwiwe ruzosubirwamwo kubera ibibazo vyagiye bishikirizwa n’abamuburanira hamwe n’ivyavuzwe na IACHR.
